Мемлекет басшысының Қазақстан халқына Жолдауындағы тапсырмасына сәйкес елімізде жол инфрақұрылымын жаңартуға бағытталған ауқымды жобалар жүзеге асуда, деп хабарлайды kazlenta.kz тілшісі ҚР Көлік министрлігіне сілтеме жасап.
Ел тұрғындары жиі қолданатын облысаралық және ауданаралық жолдарды орташа жөндеу бағдарламасының маңызы зор. Биыл шамамен 7 мың шақырым жол орташа және күрделі жөндеумен қамтылмақ.Былтыр «Жезқазған – Петропавл», «Қарағанды – Аягөз – Бұғаз», «Қандыағаш – Шалқар – Ырғыз», «Сарыөзек – Көктал» тасжолдарында орташа жөндеу жұмысы басталды. Биыл бұл жұмыс жалғасады. Сонымен қатар биыл жолшылар жаңа учаскелерді жаңартуға кірісті, олардың ішінде «Қарабұтак – Рудный – Қостанай» және «Атырау – Орал» бағыттары бар.Көлік қарқыны жоғары бағыттарға ерекше мән беріліп отыр. Мәселен, Алматы облысындағы Құлжа тасжолы орташа жөндеу жұмыстарымен қамтылды.
Абай және Шығыс Қазақстан облыстарында «Семей – Өскемен» тасжолының 73 шақырымдық бөлігінде жөндеу жалғасады. Бұл учаскеде жол жамылғысы жаңартылып, су өткізгіш құбырлар жөнделеді.Өткен жылы «Жезқазған – Петропавл» тасжолының 590 шақырымында жөндеу жұмыстары басталып, биыл тағы 119 шақырымда жалғасын табуда. Сондай-ақ былтыр «Мамлютка – Қостанай» бағытындағы 161 шақырым жолда орташа жөндеу жұмыстары басталды. Биыл бұл жұмыстар тағы 74 шақырымда жүргізіліп жатыр.