Алматыда WorldSkills Almaty-2025 чемпионатының жеңімпаздарын марапаттау рәсімі өтті, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
30 құзырет бойынша үздік шыққан қатысушылар жүлделі орын үшін марапатталды: бірінші орын — 150 000 теңге, екінші орын — 100 000 теңге, үшінші орын — 50 000 теңге. Жалпы жүлде қоры шамамен 10 миллион теңге.Чемпионат жеңімпаздары Алматының атынан WorldSkills Kazakhstan-2025 республикалық чемпионатына қатысады. Республикалық кезеңнен сүрінбей өткендер 2026 жылы Қытайдың Шанхай қаласында өтетін халықаралық финалға жолдама алады.Алматы қаласының әкімі Ерболат Досаев жас мамандарды қолдаудың маңыздылығын атап өтіп, сұранысқа ие жұмысшы мамандықтарға арналған арнайы гранттар бөлінуі мүмкін екенін айтты.Байқауды 500-ден астам сарапшы мен жұмыс беруші бағалады. Чемпионат Мемлекет басшысы жариялаған Жұмысшы мамандықтары жылы аясында өтіп, тәжірибелік дағдының маңызын айқындап, жастардың кәсіби дамуына серпін берді.