Астанада «Таза Қазақстан» экологиялық акциясы аясында Үркер тұрғын алабында орналасқан «Нұра» дене шынықтыру-сауықтыру кешені маңында ауқымды сенбілік өтті, деп хабарлайды kazlenta.kz тілшісі Астана әкімдігінің ресми сайтына сілтеме жасап.
Шараға мекеменің жас спортшылары, бапкерлері мен қызметкерлері белсенді қатысты. Олар ғимараттың терезелерін жуып, айналасын қоқыстан тазартты.
«Мұндай шаралар біз үшін өте маңызды, өйткені біз салауатты өмір салтын насихаттаймыз. Экологиялық таза қоршаған орта мен дене шынықтыру – денсаулық кепілі, сондықтан мұндай іс-шаралар тұрақты түрде өткізіліп тұрады», – деді «Нұра» дене шынықтыру-сауықтыру кешенінің басшысы Жасұлан Әбдіхалықов.Экологиялық акцияға Үркер елді мекенінің тұрғындары да қатысты.«Бүгін біз, Үркер ықшамауданының тұрғындары, йога сабағына қатысып қана қоймай, тазалық шараларын да өткіздік. Жаздыгүні далада жаттығу жасайтын аумағымызды сыпырып, тазарттық», - дейді йога жаттықтырушысы Марина Шустова.