СҚО-да есірткімен ұсталған әйел 11 жылға бас бостандығынан айырылды, – деп хабарлайды kazlenta.kz тілшісі Polisia.kz сайтына сілтеме жасап.
Полиция қызметкерлері 2024 жылдың жазында синтетикалық есірткі өткізді деген күдікпен Петропавл қаласының 24 жастағы тұрғынын ұстады.
Жеке тінту кезінде одан өткізу үшін дайындалған 20,95 грамм α-PVP және 23,71 грамм мефедрон тәркіленді. Тергеу барысында анықталғандай, ол есірткіні қаланың шетіндегі орман екпелерінен алып кеткен.
Жалпы салмағы 0,17 грамм болатын α-PVP есірткісі салынған фольгамен оралған тағы 3 түйіншек оның қолсөмкесінен табылды. Аса ірі мөлшерге жататын есірткіні жеке мақсатта пайдаланбақ болған.
Ұсталған келіншек 20 жасында есірткіні өткізу мақсатынсыз сақтағаны үшін сотталып үлгерген. Сот оның іс-әрекетінде қауіпті рецидивті байқап, оған 11 жылға бас бостандығынан айыру жазасын тағайындады.
Өткен жылы полицейлер СҚО-да есірткі сатудың 132 фактісін анықтады. Заңсыз айналымнан 8 келіден астам синтетикалық психотроптық заттар тәркіленіп алынды.