Алматы полициясы жолаушылар тасымалының қауіпсіздігін тексеруде, – деп хабарлайды kazlenta.kz тілшісі Polisia.kz сайтына сілтеме жасап.
14-16 қаңтар аралығында республика көлемінде жергілікті атқарушы органдар, Көлік министрлігінің көлік комитетінің аумақтық бөлімшелері және жұртшылық өкілдерінің қатысуымен «Тасымалдаушы» жедел-профилактикалық іс-шарасы өтуде.
Іс-шараның басты мақсаты – қоғамдық көліктегі құқық бұзушылықтарға «мүлдем төзбеушілік» қағидатын ұстану, жолаушылар тасымалы саласындағы заңнаманың сақталуын қадағалау және қауіпсіздік деңгейін арттыру.
– Қазіргі уақытта қызметкерлеріміз жолаушыларды тасымалдау барысында қауіпсіздік талаптарының сақталуын қамтамасыз ету мақсатында автокөлік компаниялары мен жеке тасымалдаушыларды тексеруде. Сонымен қатар заңсыз мигранттар мен рұқсатсыз жұмыс істеп жатқан тасымалдаушыларды анықтау үшін көші-қон полициясымен бірлескен рейдтер жүргізілуде. Алдыңғы шептегі бөлімшелердің жеке құрамы бірнеше рет және жүйелі түрде құқық бұзушылық жасаған адамдар мен іздеуде жүрген көліктерді анықтау үшін барлық тіркеу деректер базасы бойынша жүргізушілерді тексеріп жатыр, – деп мәлімдеді Алматы қалалық полиция департаменті жергілікті полиция қызметі басқармасы бастығының орынбасары Тимур Ноғайбаев.