Шетелдік азамат жылдамдықты 24 есе арттырған, – деп хабарлайды kazlenta.kz тілшісі Polisia.kz сайтына сілтеме жасап.
Қостанай облысында «Қорғау – қауіпті жүргізуші» бағдарламасының көмегімен шетелдік азамат бір ай ішінде жылдамдықты 24 мәрте рұқсат етілген шектен асырғаны анықталды. Бұл құқық бұзушылық 2024 жылдың желтоқсан айында тіркеліп, жүргізушіге 850 мың теңге көлемінде айыппұл салынды.
«Қорғау» – бұл жол қозғалысын автоматты түрде бақылауды тиімді етуге арналған цифрлық жүйе. Бағдарлама Ішкі істер министрлігінің жедел басқару орталықтары мен мобильді қосымшаларын біріктіріп, жол қауіпсіздігін қадағалауға жаңа деңгейде мүмкіндік береді. Жүйе камералар арқылы жиналған мәліметтерді нақты уақыт режимінде полиция қызметкерлерінің планшеттеріне жібереді.
Осылайша, бірқатар құқық бұзушылықтарды жылдам анықтауға болады:
жалған мемлекеттік нөмірмен жүрген көліктер;
техникалық тексеруден өтпегендер;
сақтандыру полисі жоқтар;
іздеу салынған немесе айыппұлдары төленбеген көліктер;
10 минут ішінде екі және одан көп құқық бұзушылық жасағандар.
Бағдарлама құқық бұзушы туралы ақпаратты бірден полиция қызметкеріне жеткізеді. Ал қызметкер қажет болған жағдайда алдын алу шараларын қолданады.
Жоғарыда аталған жағдай бойынша, Hyundai маркалы көліктің жүргізушісі рұқсат етілген жылдамдықты 24 рет асырып, бағдарлама назарынан тыс қалмады. Бұл оқиға «Қорғаудың» жол қауіпсіздігін қамтамасыз етудегі тиімділігін тағы бір мәрте дәлелдеді.
Айта кетейік, осы бағдарламаның арқасында өткен жылы Қостанай облысы бойынша 6 мыңға жуық жүргізуші тоқтатылып, заң бұзушылықтар бойынша ескерту жасалды. Сондай-ақ қасақана ереже бұзушылардың 300-ге жуық көлігі айып тұрағына орналастырылды.
Полиция қызметкерлері цифрлық шешімдердің жол қозғалысы ережесін сақтауға ықпал етіп, апаттық жағдайлардың алдын алуда маңызды рөл атқаратынын атап өтті. Жол қауіпсіздігі – ортақ жауапкершілік екенін естен шығармайық!