Алматыда жүздеген арнайы техника мен 1 800-ден астам жұмысшы қар шығаруға білек сыбана кіріскен, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Барлық күш-жігер қаланың әдеттегі жұмыс ырғағын сақтауға бағытталған. Шаһарды ақ ұлпадан арылтуға бел шеше кіріскен Дина Мұнарбаева Медеу ауданындағы жол жұмысшыларының аға бригадирі. Бұл салаға келгеніне 8 жылдан асты, күн райы қандай болса да, оның ұжымы тиянақты тірлігімен көзге түсіп келеді.
8 қаңтарда жауған қардың қалыңдығы мегалполисте бір түнде 16 см-ге жетті. «Алматы Тазалық» МКК бас инженері Әсет Төлегеновтың айтуынша, екі түннің ішінде қаладан шамамен 15 200 текше метр қар шығарылды. Қар шығару жұмыстары қозғалысты шектемеу үшін тоқтаусыз жалғасып отыр. Алдағы күндері қосалқы көшелер мен аула арасындағы жолдар тазартылмақ.