Премьер-Министр Олжас Бектеновтің төрағалығымен өткен Үкімет отырысында автожол саласын дамыту мәселелері қаралды. Көлік министрі Марат Қарабаев, «ҚазжолҒЗИ» Жол активтерінің сапасы ұлттық орталығының басшылығы және бірқатар облыс әкімдері ағымдағы жағдай мен атқарылып жатқан жұмыстар туралы баяндады, деп хабарлайды kazlenta.kz тілішсі Үкіметтің баспасөз қызметіне сілтеме жасап.
Мемлекет басшысының 2025 жылдың соңына қарай республикалық жолдардың барлығын нормативтік жағдайға келтіру жөніндегі тапсырмасын орындау шеңберінде бүгінде елімізде 12 мың шақырым күре жолдарды күрделі жөндеу және жаңғырту жұмыстары жүруде, бұл – рекордтық жоғары көрсеткіш. Атап айтқанда, жөнделетін жолдардың 8 мың шақырымы – республикалық, 4 мың шақырымы – жергілікті желіге тиесілі Көлік министрлігінің деректеріне сәйкес, жыл соңына дейін 7 мың шақырымда құрылыс және жөндеу жұмыстары аяқталады.
Жалпы, бүгінгі таңда еліміздегі автожолдарының жалпы ұзындығы 95 мың шақырымды құрайды, оның 25 мың шақырымы – республикалық, ал қалған 70 мың шақырымы жергілікті маңызы бар жолдарға жатады. Қазіргі таңда республикалық жолдардың нормативтік жағдайы 92%-ды, жергілікті желінің көрсеткіші 87%-ды құрап отыр. Жыл соңына дейін аталған көрсеткіштер тиісінше 93% және 89%-ға жеткізілетін болады.
Үкімет басшысы биыл «Қарағанды – Алматы», «Ақтөбе – Қандыағаш», «Атырау – Астрахан» және «Талдықорған – Өскемен» сияқты бірқатар ірі жобалар аяқталатынын атап өтті. Сондай-ақ шамамен 2,5 мың шақырым республикалық жолдарда жөндеу жұмыстары қолға алынды.
Премьер-Министр қаржыландыру мәселесіне тоқталды. Осылайша, жекелеген өңірлерде жалпы сипаттағы трансферттерді игеру қарқыны төмен. Мысалы, мұндай мәселелер Ақтөбе, Түркістан және Ұлытау облыстарында бар.
Тағы бір мәселе – жобаларды іске асыру мерзімдерінің мүлтіксіз сақталуы. Бұл әсіресе, солтүстік және шығыс өңірлер үшін маңызды. Өйткені, оларда құрылыс маусымы қысқа. Сондықтан қарқынды төмендетпеу үшін қажетті шаралардың барлығын дер кезінде қабылдау тапсырылды.
Үкімет отырысында Олжас Бектенов жолдардың жағдайына қатысты айтылып жатқан арыз-шағымдар азаймай отырғанын, олардың негізгі бөлігі жергілікті жолдарға қатысты екенін атап өтті.
«Ақтөбе облысы Мұғалжар ауданының тұрғындары Жұрын мен Қаракөл ауылдарының арасында биыл төселген асфальттың сапасын көрсетті – жаңадан төселген асфальт қолмен үгітіліп жатыр. Ал Жетісу облысы Кербұлақ ауданы Қоянкөз ауылының тұрғындары асфальт төсеу технологиясын сақтамаған мердігер компанияны өз жұмысын тоқтатуға мәжбүр етті. Әкімдіктер қайда, неліктен күнделікті сапалы бақылау жүргізілмей жатыр? Бірінші кезекте тұрғындардың шағымдарына дер кезінде назар аудару керек», — деп атап өтті Олжас Бектенов.
Көлік министрлігі облыстар әкімдіктерімен бірлесіп, қолданыстағы жол-құрылысы жобаларының уақтылы аяқталуын қамтамасыз етуі керек. Сондай-ақ мына мәселелерді атап өткім келеді. Ол үшін жер учаскелерін алдын ала резервке қою тапсырылды.
Бүгінгі таңда жаңа автожол жобаларын бастау үшін 550 учаскені алу қажет. Олардың ішінде «Қарағанды – Жезқазған», «Ақтөбе – Ұлғайсын» және «Сарыағаш қаласының айналма жолы» бар.