2021 жылғы 23 қаңтарда сағат 3:50-де ҚР ТЖМ РЖҚЖ кезекші-диспетчерлік бөліміне Қарасай ауданының Көк-лай-сай шатқалында құтқарушылардың көмегі қажет деген хабарлама келіп түсті, деп хабарлайды kazlenta.kz.
Құрамында 6 адам бар жедел топ 1 бірлік автотехникамен оқиға орнына жедел шықты. Тайғақ жолдың салдарынан тауға көтеріліп бара жатқан автокөлік жолдан шығып кетіп, жол жиегіндегі жарға оң жағындағы екі доңғалақ түсіп кеткен. Көлік бүйірімен ағашқа тіреліп, жарға құламай қалған.
Көліктегі үш адам машинадан шыға алмай қалған, себебі жеңіл автокөлік жарға құлап кетуі мүмкін еді. Жағдай әр минут сайын қиындай түсті, себебі көліктің жанармайы таусылып, зардап шеккен адамдар тоңып қалды. Құтқарушылар эвакуацияны бастамас бұрын, полиспасттың көмегімен машинаны бекітті. Оны жардан шығарып, екі тростың көмегімен көлікті қауіпсіз аймаққа сүйреп шығарды. Зардап шеккен адамдар көліктен шықты, ешқайсысына медициналық көмек қажет болмады.