Уәкілетті орган жалған техникалық байқаулардың күшін жою жөніндегі заңнамалық тетікті әзірледі, деп хабарлайды kazlenta.kz тілшісі ҚР Көлік министрлігінің баспасөз қызметіне сілтеме жасап.
Жылдың басынан Қазақстанда техникалық байқаудан өткізетін 350 оператордың қызметі тоқтатылып, айыппұл салумен 131 әкімшілік материал ресімделді. Бұл туралы ҚР Үкіметінің жол қозғалысы қауіпсіздігі мәселелері жөніндегі отырысында Көлік министрінің м.а. Талғат Ластаев мәлімдеді.
Сондай-ақ баяндамашы автокөлік құралдарын техникалық байқаудан өткізу саласындағы бұзушылықтарды болдырмауға бағытталған жүйелі шаралар туралы айтып берді.
«Автомобильдердің жай-күйін назарға ала отырып, техникалық байқау операторларының көлік құралынсыз техникалық байқау жүргізгені үшін айыппұлды 10-нан 150 АЕК-ке дейін (517 500 теңге) ұлғайту бойынша жұмыс жүргізілуде. Сондай-ақ көлік құралдарының иелеріне жалған техникалық байқаудан өткені үшін және операторға техникалық байқауды ұйымдастыру әрі өткізу қағидаларын бұзғаны үшін айыппұлдар енгізілетін болады. Айыппұл мөлшері тиісінше 5 және 150 АЕК болады», - деді Т.Ластаев.
Сонымен қатар «Техникалық байқау» жүйесінде жалған техникалық байқаулардың күшін жою жөніндегі заңнамалық норма көзделген.