Аймақтағы Төтенше жағдай департаментінен хабарланғандай, өрт төрт сағаттан астам уақытқа созылған. Ауа райының шамадан тыс ыстық болуы, онсыз да қурап тұрған өсімдіктердің тез жануына себепші болды.
«Ыстық күнде өртті бірден өшіру мүмкін болмады. Дегенмен аудандағы барлық мекемелердің ұйымшылдығы арқасында жалынның бетін қайтардық. Сағат 14.00-де басталған дала өртін 18.23-те толық өшіріп болдық. 10 гектар жер күлге айналды», - дейді Индер аудандық ТЖ бөлімінің басшысы Ержан Нұрланов.
Жалын Индер желілік өндірістік басқармасына қарасты «Орталық Азия» газ құбырына, орманға жақын болғандықтан, оған жеткізбей өшіруге күш салынған. ТЖ қызметкерлеріне орманшылар мен газшылар техника, адам күшімен көмектескен. Өрттің шығу себептері анықталуда.