Қызылордада тәртіп бұзған есептегі сотталған қамауға алынды, – деп хабарлайды kazlenta.kz тілшісі Polisia.kz сайтына сілтеме жасап.
Қызылорда қалалық пробация қызметі есебінде 500-ге жуық сотталған тіркеуде тұр. Жыл басынан бері жаза өтеу талаптарын орындамаған, отбасында тыныштықты бұзып, бірнеше рет берілген ескертуге құлақ аспаған 11 сотталғанның бас бостандығын шектеу жазасы бас бостандығынан айыру жазасына ауыстырылды. Солардың қатарын бүгін тағы бір азамат қосылды. Есептегі азамат 3 жыл мерзімге бас бостандығын шектеу жазасы тағайындалған. Сонымен қатар оған 100 сағат мәжбүрлі еңбек міндеттеліп, пробация қызметінің есебіне алынған. Алайда сотталған азамат белгіленген талаптарды өрескел бұзған. Ол пробация қызметіне уақытылы тіркелмей, жаза өтеуден жалтарған, мәжбүрлі еңбекті орындаудан бас тартқан.
Бұдан бөлек, ішімдікке салынып, отбасының берекесін алған. Осыған байланысты пробация қызметі сотқа ұсыныс жолдап, бас бостандығын шектеу жазасын қатаң жаза — бас бостандығынан айыруға ауыстыруды сұраған. Нәтижесінде сот шешімімен жазаның өтелмеген бөлігі, яғни 2 жыл 6 ай мерзім түзеу мекемесінде өтелетін болды.