Қызылордада жаза өтеу тәртібін бұзған есептегі сотталған темір торға жіберілді, - деп хабарлайды kazlenta.kz тілшісі Polisia.kz сайтына сілтеме жасап.
Байқоңыр қалалық пробация қызметінің есебінде тұрған азамат енді жазасының қалған бөлігін түзеу мекемесінде өтейтін болды. Аталған азамат сот үкімімен ұрлық жасағаны үшін 3 жыл мерзімге бас бостандығын шектеу жазасына сотталған. 2025 жылдың қазан айында ол Байқоңыр қалалық пробация қызметінің есебіне алынған.
Алайда есепке алынғаннан кейін бар болғаны екі айдың ішінде пробациялық бақылаудан жасырынып, сот үкімімен белгіленген мәжбүрлі еңбекті орындаудан бас тартқан. Қазақстан Республикасының Қылмыстық-атқару кодексінің талаптарына сәйкес, бас бостандығын шектеу жазасына сотталған адамның пробациялық бақылаудан жасырынуы немесе мәжбүрлі еңбекті дәлелсіз себептермен бір ай ішінде екі және одан да көп рет орындамауы – жаза өтеу тәртібін қаскөйлікпен бұзу болып саналады. Осыған байланысты пробация қызметі сотталған азаматқа қатысты Байқоңыр қалалық сотына бас бостандығын шектеу жазасын бас бостандығынан айыру жазасына ауыстыру туралы ұсыным жолдады.
Сот қаулысымен сотталғанның бас бостандығын шектеу жазасының өтелмеген 2 жыл 8 ай 11 күн мерзімі дәл сол мерзімге бас бостандығынан айыру жазасына ауыстырылды. Ол жазасын қылмыстық-атқару жүйесінің орташа қауіпсіздік мекемесінде өтейтін болады. Қаулы заңды күшіне енді.