Қытайдың Гуйян қаласында бокстан әлем кубогының екінші кезеңі аяқталды. Дүбірлі додаға әлемнің 44 елінен 300-ге жуық спортшы қатысты. Турнирде астаналық былғары қолғап шеберлері екі алтын медаль жеңіп алды, деп хабарлайды kazlenta.kz тілшісі Астана әкімдігінің ресми сайтына сілтеме жасап.
Жарысқа Қазақстан құрамасы сапында 17 боксшы қатысып, жалпы сегіз жүлдеге қол жеткізді. Бұл нәтижеге Астана спортшылары да қомақты үлес қосты.
Ел намысын халықаралық турнирде қорғаған елордалық боксшылар: Санжар Тәшкенбай (50 келіге дейін), Тимур Нұрсейітов (75 келіге дейін), Нұрбек Оралбай (90 келіге дейін) және Айбек Оралбай (90 келіден жоғары).
Жарыстың басты қаһармандары Айбек Оралбай мен Санжар Тәшкенбай болды. Екеуі де өз салмақ дәрежелерінде алтын медаль жеңіп алды.
Әлем чемпионы Айбек Оралбай аса ауыр салмақта турнир жеңімпазы атанды. Ол алтын жүлдеге барар жолда АҚШ өкілі Нажай Райтты (5:0), Ұлыбритания боксшысы Мэттью Уильямсты (5:0), бразилиялық Жоэл Рамосты (3:2) жеңіп, финалда Германия спортшысы Никита Путиловты 5:0 есебімен айқын басымдықпен ұтты.
Екі дүркін әлем чемпионы Санжар Тәшкенбай да жоғары деңгейде өнер көрсетті. Ол 50 келіге дейінгі салмақта финалда Өзбекстанның Азия чемпионы Асилбек Жалиловты төрешілердің 3:2 есебіндегі шешімімен жеңіп, алтын медаль иеленді. Бұған дейін қазақстандық боксшы Қырғызстан өкілі Анваржан Ходжиев пен испаниялық Мартин Молина Сальвадорды 5:0 есебімен сенімді түрде ұтқан болатын.
Олимпиаданың күміс жүлдегері Нұрбек Оралбай ширек финалда әлем чемпионы өзбекстандық Турабек Хабибуллаевқа 2:3 есебімен жол беріп, жарысты аяқтады.
Ал Тимур Нұрсейітов 75 келіге дейінгі салмақта ширек финалға дейін жетіп, әлем чемпионатының жүлдегері, болгариялық Рами Киванмен қолғап түйістірді.
Жарыс қорытындысы бойынша Қазақстан құрамасы 5 алтын және 3 қола медаль жеңіп алып, жалпыкомандалық есепте екінші орынға тұрақтады.
Жалпыкомандалық есептегі үздік үштік:
• 1-орын – Қытай: 5 алтын, 1 күміс, 3 қола медаль;
• 2-орын – Қазақстан: 5 алтын, 3 қола медаль;
• 3-орын – Өзбекстан: 4 алтын, 3 күміс, 4 қола медаль.