Бүгін мемлекет басшысы Қасым-Жомарт Тоқаев БҚО, СҚО, Павлодар және Қостанай облыстарының әкімдерін қабылдады, деп хабарлайды Ақорда.
Өз кезегінде, Батыс Қазақстан облысының әкімі Нариман Төреғалиев президентке өңірдің биылғы әлеуметтік-экономикалық дамуының негізгі көрсеткіштері туралы баяндаған. Сондай-ақ инвестициялық жобалардың және Жұмыспен қамту жол картасының жүзеге асырылу барысы туралы мәлімет берген. Ал күні кеше Павлодар облысының әкімі болып тағайындалған Асайын Байханов Екібастұз ЖЭС-інің жылу желілеріндегі апаттың салдарын жоюға бағытталған шаралар жөнінде есеп берген. Павлодар облысының әкімі Асайын Байханов президент қабылдауда.
Айтуынша, Екібастұз қаласының жылу жүйесін қалпына келтіру жұмыстары 15 желтоқсанға дейін аяқталады. Сондай-ақ Асайын Байханов кездесу барысында облыстың негізгі әлеуметтік-экономикалық көрсеткіштері және ауыл шаруашылығын дамыту, ауыл халқын сапалы ауызсумен қамтамасыз ету, көлік инфрақұрылымы мен тұрғын үй құрылысын дамыту жөніндегі тапсырмалардың орындалу барысы туралы баяндаған. Бұдан кейін мемлекет басшысының қабылдауында Солтүстік Қазақстан облысының әкімі Айдарбек Сапаров болды. Ол өңірді дамыту жоспары мен берілген тапсырмалардың орындалуы жөнінде мәлімет берді. СҚО әкімі Айдарбек Сапаров президент қабылдауында.
Сонымен бірге, Қасым-Жомарт Тоқаевқа Қостанай облысының әкімі Құмар Ақсақалов та есеп берді. Ол қазіргі әлеуметтік-экономикалық дамуының негізгі көрсеткіштері туралы есеп беріп, өңірдегі әлеуметтік-экономикалық өсім мен инвестиция тарту жөнінде баяндады. Сонымен қатар әкім Президентке Қостанайда өтетін ХІХ өңіраралық форумға дайындықтың басталғанын жеткізді. Мемлекет басшысы жаңадан тағайындалған облыстардың әкімдеріне өңірлерді дамыту және тұрғындардың әл-ауқатын арттыру жөнінде бірқатар нақты тапсырма берді. Сондай-ақ ауыл шаруашылығына жан-жақты қолдау көрсету арқылы ауылдардың өркендеуін қамтамасыз етуді, инфрақұрылымдарды жаңғыртып, көлік-логистикалық ахуалды жақсартуды тапсырды.
8-12-2022, 17:15
Президент бірқатар облыс әкімдерін қабылдады
Егер мәтінде қате байқасаңыз, оны таңдап, Ctrl+Enter пернелерін басыңыз