Жамбыл облысында желатин, пептон, коллаген және өзге де ақуыз өнімдерін өндіретін жаңа зауыт салынуда, деп хабарлайды kazlenta.kz тілшісі ҚР АШМ баспасөз қызметіне сілтеме жасап.
Құны 5 млрд теңге болатын инвестициялық жобаны «Taraz Gelatin» ЖШС жүзеге асырып жатыр. Кәсіпорын 8 гектар аумаққа орналастырылады. Зауытты 2026 жылдың IV тоқсанында іске қосу жоспарланған.
Кәсіпорын жылына 3 мың тоннаға дейін тағамдық желатин және 1 мың тоннаға дейін пептон, коллаген мен басқа да ақуыз өнімдерін өндіре алады.
Қазір зауыт құрылысының шамамен 80 пайызы аяқталған. Негізгі құрылыс-монтаж жұмыстары тәмамдалып, технологиялық жабдықтардың барлығы дерлік орнатылды. Қазіргі таңда өндірісті іске қосып, жабдықтарды сынақтан өткізуге дайындық жүріп жатыр.
Инвестор болашақ кәсіпорынды қажетті шикізатпен қамтамасыз ету мәселесін де қатар шешуде. Өндірістің негізгі шикізаты – ірі қара малдың терісі. Осы мақсатта «Taraz Gelatin» Алматы, Семей, Тараз және Арқалық қалаларындағы ет өңдеу кәсіпорындарымен келісім жасап, 40 тонна ірі қара терісін жеткізу бойынша алдын ала шарттарға қол қойған.
Жобаның іске асырылуы мал шаруашылығы өнімдерін терең өңдеуге жол ашып, қосылған құны жоғары отандық өнім өндірісін арттыруға мүмкіндік береді.