Көлік құралын басқару құқығынан айырылғанына қарамастан, Хромтау тұрғыны қайтадан рөлге отырып, алкогольдік масаң күйде көлік басқарған, деп хабарлайды kazlenta.kz тілшісі Polisia.kz сайтына сілтеме жасап.
19 қыркүйек күні сағат 01:30 шамасында Хромтау қаласында патрульдік полиция қызметкерлері жол қозғалысын бақылау барысында Opel Vectra автокөлігін тоқтатқан. Көлік тоқтағаннан кейін жүргізуші автокөліктен түсіп, полиция қызметкерлерінен қашып кетуге әрекет жасаған. Алайда тәртіп сақшылары оның әрекетін дер кезінде тоқтатып, жүргізушіні ұстады.
Тексеру барысында ер адамнан алкогольдік масаңдық белгілері анықталды. Сонымен қатар оның осы жылдың тамыз айында көлік құралын басқару құқығынан алты ай мерзімге айырылғаны белгілі болды. Соған қарамастан, жүргізуші заң талаптарын елемей, қайтадан көлік тізгініне отырып, масаң күйде көлік басқарған. Автокөлік Хромтау аудандық полиция бөлімінің арнайы автотұрағына қойылды. Жүргізуші уақытша ұстау изоляторына қамалды. Жыл басынан бері Ақтөбе облысында көлік басқару құқығынан бұрын айырылған адамдардың көлік құралын қайта басқаруына қатысты 47 факт анықталды.