Елорда күніне орай Астанада Eco Day экологиялық іс-шарасы ұйымдастырылды. Оның аясында «Жасыл ел» еңбек жасағының сарбаздары мен эко-белсенділерге Эко-Хабта экскурсия өткізілді, деп хабарлайды қала әкімдігінің ресми сайты.
Қатысушыларға экологиялық мәселелер туралы айтылып, қайта өңделген материалдардан жасалған өнімдер таныстырылды. Сондай-ақ қалдықтарды бөлек жинау бойынша шеберлік сабағы өткізіліп, оларды сұрыптаудың ерекшеліктері түсіндірілді.
«ECO Network» компаниясының Астанадағы өкілдігінің жетекшісі Гүлнәр Хан жастардың экологиялық бастамаларға қызығушылығы жоғары екенін айтты.
«Біз жастардың бұл бағытқа ерекше қызығушылық танытып отырғанын көріп жүрміз. Студенттер мен жоғары сынып оқушылары үшін экскурсияларды жиі ұйымдастырамыз. Олардың көбі кейін ерікті ретінде бізге келеді. Сондықтан осындай іс-шараларды өткізгенімізге әрдайым қуаныштымыз. Бұл тақырыпты мүмкіндігінше кеңінен насихаттап, бәрін іс жүзінде көрсетеміз. Өйткені қайта өңдеу саласына қатысты көптеген жалған әңгіме бар. Кейбір адамдар қайта өңдеудің бар екеніне мүлде сенбейді, енді біреулері оның қалай жұмыс істейтінін, инфрақұрылымының қандай екенін және нақты нәтижесін көрмейді. Ал біздің хабта бәрі бір жерде жинақталған. Сондықтан мұнда үлкен ағартушылық алаң қалыптастырылған», – деді Гүлнәр Хан.
Шеберлік сабағында белсенділерге қайта өңдеудің нақты нәтижелері де көрсетілді. Эко-Хабта жиналған пластик қақпақтардан орындықтар жасалады. Бір орындық дайындау үшін шамамен 15 мың пластик қақпақ қажет.
Өткен жылы Астанадағы бірнеше тұрғын үй кешенінің тұрғындары жинаған қақпақтардан бес орындық жасалып, кейін аулаларға орнатылған. Ал Қазақстандағы Нидерланд Корольдігінің елшілігі қайта өңделген пластиктен жасалған тағы төрт орындыққа тапсырыс берген. Олар жуырда елорданың саябақтарының біріне орнатылады.