Жеке тұлғалардың банкроттығы рәсімдерінің 3 түрі қолданылады. Бұл туралы Үкімет отырысында ҚР Премьер-Министрінің орынбасары – Қаржы министрі Ерұлан Жамаубаев айтты, деп хабарлайды ҚазАқпарат-қа сілтеме жасаған kazlenta.kz
«Жеке тұлғалардың банкроттығы мен төлем қабілеттігін қалпына келтіруге қатысты бүгінгі таңда заң жобасы Парламентте талқыланып жатыр. Халықаралық тәжірибені ескере отырып, жеке тұлғалардың банкроттығы рәсімдерінің мынадай 3 түрі қолданылатын болады: соттан тыс банкроттық; сот банкроттығы. Бұл ретте борышкердің мүлкі сауда-саттықта сатылатын болады. Төлем қабілеттілігін қалпына келтіру рәсімі - тұрақты кіріс болған жағдайда сотта борыштарын бөліп-бөліп төлеу мүмкіндігін көздейді», - деді министр.
Оның атап өтуінше, өтініштерді өңдеу процесін автоматтандыру бойынша жұмыстар белсенді жүргізіліп жатыр.
«Барлық қажетті заңға тәуелді нормативтік құқықтық актілер қысқа мерзімде қабылданатын болады. Мемлекет басшысының қалған тапсырмалары бойынша мүдделі мемлекеттік органдармен бірлесіп кешенді жұмыс жүргізіледі», - деді Ерұлан Жамаубаев.