Республика күніне тағы бір тарту. Бүгін Шымкент қаласындағы Қонаев даңғылы мен Рысқұлов көшесінің қиылысындағы жолайырығы ресми түрде ашылды. Қаланың бас жоспарына сəйкес көлік кептелісін азайту мақсатында осыдан екі жыл бұрын құрылысы басталған жолайрық мерекеге орай, салтанатты түрде пайдалануға берілді. 25 қазан – Республика күніне арналған іс-шараға қала әкімі Мұрат Әйтенов және тиісті басқарма басшылары, мердігер компанияның жетекшілері, сондай-ақ қала тұрғындары даі қатысты. Шара барысында сөз алған шаһар басшысы бірқатар атқарылған жұмыстарды да тілге тиек етіп кетті.
– Бұл жолайырық былтырдан бері техникалық түрде ашылып, қала тұрғындары пайдаланып келеді. Жобаға қосымша жаяу жүргіншілерге арналған жерасты өткелдері салынып, айнала абаттандырылды. Бұл – мегаполистегі ірі жобаның бірі. Бәріңізге сәттілік тілеймін. Ұлттық мерекеміз құтты болсын. Аспанымыз ашық, еліміз аман болсын! – деді Шымкент қаласының əкімі Мұрат Дүйсенбекұлы Əйтенов.
Əкімі бастап, тұрғындары қоштаған топ қуанышты күні шынар ағашының көшеттерін екті. Жаңа біткен жолайырықтың жұмысымен кеңірек танысып, жаяу жүргіншілерге арналған өткелдермен жүріп көрді.
Шымкент қалалық жолаушылар көлігі және автомобиль жолдары басқармасы өкілдері берген мәліметке сәйкес, қаланың бас жоспарына сәйкес қолға алынған жолайырықтың құрылысы 2020 жылдың қазан айында басталған. 2021 жылдың соңында, көлік кептелісін азайту мақсатында, техникалық тұрғыда көлік қозғалысы үшін ашылған болатын. Шымкент қаласы үшінші мегаполис мəртебесін алғалы, жол көлік қатынастарын реттеу кезек күттірмес шаруа болғаны белгілі. Осы жылдар аралығында қала аумағында айтарлықтай біраз жұмыстар атқарылды. Жолдар кеңейіп, жаяу жүргіншілер мен велосипед тебетін азаматтарға да ыңғайластырылған инфраструктура қалыптасты. Жүйелі жұмыстар көп күттірмей жақсы нəтиже көрсетті.
Зерделеу жұмыстарының нәтижесі бойынша 2019 жылы Қонаев даңғылы мен Рысқұлов көшесі қиылысының өткізгіштігі тәулігіне 27 775 көлік болса, бүгінде бұл көрсеткіш тәулігіне 66 мың көлікке жуықтап отыр. Демек, үш есе өскен көлік көрсеткішіі еркін қатынауға мүмкіндік алып отыр. Ендігі қала тұрғындары тар жолдарда кептеліспен күй кешпей, кең көшелерде жөйіткейтін болады.