Текелі қаласындағы «Текелі тынысы» газетінің редакция ұжымы Бұқаралық ақпарат құралдары қызметкерлерінің кәсіби мерекесінде шығармашылыққа жақын, болашағын журналистикамен байланыстырғысы келетін балаларды қуантты, деп хабарлайды Kazlenta.kz
«Текелі тынысы» газеті қала құрылған 1952 жылдан бері үздіксіз жарық көріп келеді. Текелінің тыныс-тіршілігі, әлеуметтік-экономикалық, мәдени-рухани даму ауанының айнасы болып келе жатқан басылымға биыл – 70 жыл. Осы мерейтой және Балалар жылы аясында газет редакциясы жеті балаға сыйлық тарту етті. Алдыңғы буынның жылы лебіздеріне көңілдері өсіп, сыйлыққа мәз-мейрам болған балалар сөз өнерінің, шығармашылықтың және жақсы оқу мен жақсы оқушы болудың бір сәт болса да рахатын сезінді.
Өлең өлкесіне қадам басып келе жатқан жас талант №2 орта мектебінің 8 сынып оқушысы Нұрдәуір Есболатұлы Текелі қаласының 70 жылдығына арнаған өлеңін оқыды.