Көмекке мұқтаж балаларды мектепке дайындап, барынша қамту мақсатында тұрақты негізде жасап жатқан «Мектепке жол» акциясы жыл бойы жұмыс істеп келеді. 19 тамыз күні Орал қаласының №50 жалпы орта білім беретін мектебінде аталмыш акция жалғасын тапты, деп хабарлайды kazlenta.kz.
Облыстық қоғамдық-педагогикалық «Ел және мұғалім» газетінің редакциясы қайырымдылық акциясына белсене қатысып, 25 оқушыға мектеп құралдарын сыйға тартты. Акция аясында «Ел және мұғалім» газетінің бас редакторы Жанбол Ғалиев атынан «Nur Otan» партиясы Орал қалалық филиалының қабылдау бөлмесіне мамандардың қаысуымен оқу құралына толтырылған 10 сөмке табысталып, 3 көпбалалы отбасыға көмек қолы созылды. Қайырымдылық акциясына үн қосу мақсатында редакция ұжымы да үш мектептің аз қамтылған санаттағы балаларына тарту жасады.
Акцияның басты мақсаты әр баланы оқумен толық қамтуға жағдай жасау, жаңа оқу жылына дайындық кезінде білім беру саласындағы заңнамалық нормативтік акттерге сәйкес көмек қажет ететін балаларға материалдық қолдау көрсету болып табылады. «Атамекенім» қоғамдық қорының қолдауымен 2020 жылдан бастап «www.atamekenim.kz» порталында көмекке мұқтаж ата-аналар өтінім бере алатын «Мектепке жол» платформасы жұмыс жасайды. Аталмыш акцияға үн қосып, қайырымдылық жасаймын деуші демеушілер мен меценаттар онлайн түрде қаражат аудару арқылы көмектесе алады. Түскен өтініштер ұлттық білім беру дерекқорының мәліметтерімен салыстырылып, кейін көмек атаулы түрде бөлінеді.
БҚО білім басқармасы баспасөз қызметінің хабарлауынша 2021 жылдың 10 тамыздағы жағдайы бойынша көмекке мұқтаж 1469 оқушыға 11 565,928 мың теңгеге демеушілерден көмек көрсетілген. Оның ішінде 574 оқушыға 6 266,942 мыңға киім-кешек, 12 оқушыға 1 939,339 компьютер, 728 оқушыға 2 659,446 кеңсе тауарлары, 37 оқушыға ақшалай көмек, 96 оқушының отбасына азық-түлік, 13 оқушының отбасына отын және дәрі-дәрмекпен, 5 оқушыға телефон және 4 оқушының үйіне ғаламтор ақысын төлеу сияқты барлығы 700,201мың теңгеге материалдық көмек көрсетілді.
«Мектепке жол» акциясы аясында облысымыз бойынша көмекке мұқтаж оқушыларға көмек көрсету жалғасын табатын болады.