Қазіргі кезде Алматыдағы бірнеше жекеменшік жатақханада студенттерді орналастыруға мүмкіндік бар. Жалпы саны 830 бос орын ұсынылып отыр. Бұл туралы қалалық Жастар саясаты басқармасының өкілдері мәлімдеді, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Бос орындар бес нысанға бөлінген. Атап айтқанда, Mango Residence жатақханасында – 500, «ANU Group» ЖШС-де – 150, Royal House жатақханасында – 100, «Маер Трейд» ЖШС-де – 50 және Макеева ЖК жатақханасында 30 орын бар.
Қазір Алматыда барлығы 136 студенттік жатақхана жұмыс істейді. Оның 93-і оқу орындарының қарамағында болса, 43-і жекеменшікке тиесілі. Бұдан бөлек, студенттерді орналастыру үшін 60 хостел де пайдаланылады.
Қаладағы 35 жоғары оқу орнында 221 мың студент білім алып жатыр. Олардың 149 мыңы Қазақстанның басқа өңірлерінен келген, ал 17 мыңы – шетелдік студенттер.
Студенттерді жатақханамен қамтамасыз ету мақсатында қалада жаңа нысандар да ашылып жатыр. 2023–2025 жылдары жалпы 12 773 орынға арналған 43 нысан пайдалануға берілді. Ал 2026 жылы тағы 13 нысанды іске қосу жоспарланған. Олар 3 775 орынға шақталған. Жаңа орындардың 83%-дан астамы жеке инвесторлардың есебінен ашылады.
2026 жылдың қорытындысы бойынша Алматыдағы студенттерге арналған тұрғын үй қорының жалпы сыйымдылығы шамамен 50 мың орынға жетеді деп болжанып отыр.
Жатақханаға орналасу мәселелері бойынша +7 705 191 34 19 телефоны арқылы кеңес алуға болады.