2018 жылғы Бостон марафонының жеңімпазы Юки Каваучи Қазақстанға алғаш рет келді. Жапондық желаяқ 27 қыркүйекте өтетін Almaty Marathon жарысына қатысады. Бұл оның Орталық Азиядағы алғашқы старты. Бұл туралы Алматы қаласы Спорт басқармасының өкілдері айтты, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Каваучи спорттық мансабының басым бөлігінде жүгіруді мемлекеттік қызметтегі жұмысымен қатар алып жүрген. 2018 жылы ауа райы күрт өзгерген күрделі жағдайда өткен Бостон марафонында 2:15:58 нәтижесімен жеңіске жетті. Ал кәсіби спортшы ретіндегі мансабын бір жылдан кейін бастады.
Ерекше спорттық жолына байланысты оған Citizen Runner – «халықтық жүгіруші» деген лақап ат қойған. Каваучи 100-ден астам марафонды 2 сағат 20 минуттан аз уақытта жүгіріп өтіп, Гиннестің рекордтар кітабына енді. 42,2 шақырым қашықтықтағы жеке рекорды – 2:07:27.
«Бұл менің Қазақстанға алғашқы сапарым. Алматыны жүгірушінің көзімен көріп, қаламен, оның тұрғындарымен танысып, ерекше энергиясын сезінуді асыға күтіп жүрмін. Маған әртүрлі елдердегі марафондарға қатысу ұнайды. Біз түрлі тілде сөйлеп, әртүрлі мәдениеттің өкілі болуымыз мүмкін. Бірақ сөре сызығында бір-бірімізді сөзсіз түсінеміз», – деді Юки Каваучи.
Биылғы мерейтойлық марафонға 16 мың адам қатысады. Олардың шамамен әр оныншысы – шетелдік спортшы, ал 14%-ға жуығы Қазақстанның өзге өңірлерінен келеді. Марафонның негізгі 42,2 шақырымдық қашықтығын 1,6 мыңға жуық қатысушы таңдаған.
Биыл ұйымдастырушылар жарыс бағытын толық жаңартты. 42,2 шақырымдық марафон қашықтығы алғаш рет бір айналыммен өтіп, Алматының тарихи орталығын қамтиды. Жарыстың сөресі сағат 07:30-да Абай алаңынан басталады, ал мәресі Республика алаңында орналасады.
Almaty Marathon Алматы қаласы әкімдігінің қолдауымен өтеді. Ұйымдастырушысы – «Бірінші болу – батылдық» корпоративтік қоры.