Шымкентте күрделі онкологиялық және гематологиялық аурулары бар пациенттерге медициналық көмектің заманауи түрлері кезең-кезеңімен енгізілуде. Қалалық көпбейінді аурухананың Онкологиялық орталығында жоғары технологиялық диагностика мен емдеу әдістері қолданылып, пациенттердің өз өңірінде күрделі медициналық көмек алу мүмкіндігі кеңейіп келеді, деп хабарлайды kazlenta.kz.
Орталықта эндоваскулярлық онкология бағытында бауыр, ұйқы безі және жатыр ісіктеріне химиоэмболизация, ал бауыр ісіктеріне радиожиіліктік абляция жүргізіледі. Процедуралар заманауи ангиографиялық жүйенің көмегімен орындалады. Бұл технология дәрігерлерге ісік ошағын дәл анықтап, емдік әсерді нысаналы түрде жүргізуге мүмкіндік береді.
Аталған емдеу тәсілдерін онколог-химиотерапевт, ангиохирург, PhD докторы Исаметов Давран Рашитович және рентгенхирург, интервенциялық хирург Нұрбаев Нұржан Қошқарұлы жүзеге асырады. Кейбір пациенттер орталыққа аурудың кеш кезеңінде, жалпы жағдайы ауыр күйде түскен. Емнен кейін науқастарда ісік көлемінің азаюы және жалпы жағдайының жақсаруы байқалған.
Онкологиялық орталықтың хирургиялық бөлімшесінде де жоғары технологиялық операциялар жүргізіледі. Бүйрек ісігі кезінде лапароскопиялық нефрэктомия және бүйрек резекциясы сияқты аз инвазивті әдістер қолданылады. Мұндай операциялар хирургиялық жарақатты, қан жоғалтуды және операциядан кейінгі ауырсынуды азайтып, пациенттің қалпына келу уақытын қысқартуға мүмкіндік береді.
Бұл бағыттағы операцияларды аурухана директоры, жоғары санатты онкоуролог, PhD докторы Талғат Құрманов және хирургиялық бөлімше меңгерушісі, медицина магистрі, жоғары санатты онкоуролог Шалқарбек Мугалбеков жүргізді. Операциядан кейін пациенттің жағдайы тұрақты, оңалту шаралары жалғасуда.
Шымкент медицинасы үшін маңызды тағы бір қадам – гемопоэздік дің жасушаларының аутологиялық трансплантациясының алғаш рет сәтті орындалуы. Трансплантация 2026 жылғы 7 тамызда Онкологиялық орталығы бар қалалық көпбейінді аурухана базасында жасалды. Процедурадан өткен 56 жастағы Әміржан Әмірбекұлының жағдайы тұрақталып, үйіне шығарылды.
Бұл трансплантацияға ұзақ дайындық жүргізілді. Пациенттің дің жасушаларын жинау, сақтау және тасымалдаудың барлық кезеңі арнайы талаптарға сай орындалды. Трансплантациядан кейін жасушалардың орнығуы байқалып, қан көрсеткіштерінде оң динамика тіркелді, – деді аурухана директоры Талғат Құрманов.
Орталықта Шымкент тұрғындарымен бірге Қызылорда, Жамбыл, Түркістан, Ақтөбе облыстарынан, сондай-ақ Қырғыз Республикасынан келген пациенттерге де медициналық көмек көрсетіледі. Сонымен қатар орталық мамандары халықаралық тәжірибені жетілдіру мақсатында Ресей, Жапония, Оңтүстік Корея, Қырғызстан, Өзбекстан және басқа да елдердің әріптестерімен тұрақты түрде тәжірибе алмасып, шеберлік сабақтарына қатысады. Бұл өз кезегінде заманауи емдеу тәсілдерін жергілікті медицина тәжірибесіне енгізуге және мамандардың кәсіби біліктілігін арттыруға мүмкіндік береді.
Осылайша, Шымкентте онкология және гематология саласында жоғары технологиялық медициналық көмектің қолжетімділігі артып келеді. Заманауи диагностика мен емдеу әдістерінің, аз инвазивті хирургияның және гемопоэздік дің жасушаларын трансплантациялау мүмкіндіктерінің дамуы күрделі диагнозы бар пациенттерге қажетті көмекті өз өңірінде алуға жағдай жасап отыр. Алдағы уақытта бұл бағыттарды одан әрі дамыту медициналық көмектің сапасы мен қолжетімділігін арттыруға мүмкіндік береді.