Алматы қаласы әкімі аппаратының басшысы Ерлан Исабеков ЕҚЫҰ Демократиялық институттар және адам құқықтары жөніндегі бюросының (ДИАҚБ) Төтенше және Өкілетті Елші Винсент Пикет бастаған сайлауды байқау миссиясының өкілдерімен кездесті. Тараптар Қазақстан Республикасы Құрылтайының сайлауына дайындық және халықаралық байқау аясындағы өзара іс-қимыл мәселесін талқылады, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Кездесу барысында Алматы әкімдігі Қазақстан Республикасының заңнамасына сәйкес сайлауды өткізуге қажетті ұйымдастырушылық қолдау көрсетіп отырғаны атап өтілді. Миссия өкілдеріне 670 сайлау учаскесінің дайындығы, қауіпсіздікті қамтамасыз ету шаралары, мүгедектігі бар адамдар үшін дауыс берудің қолжетімділігі, сондай-ақ сайлаушыларға арналған цифрлық сервистердің жұмысы туралы ақпарат ұсынылды. Кездесу соңында тараптар ашық диалог пен сындарлы ынтымақтастықты сақтауға дайын екенін білдірді.