Фермерлер егіс құрылымын әртараптандыруды күшейтіп, қосылған құны жоғары дақылдарды өсіруге басымдық беруде. Бұл үрдісті «Азық-түлік келісімшарт корпорациясының» форвардтық сатып алу бағдарламасының нәтижелері де растап отыр. Өткен аграрлық маусыммен салыстырғанда майлы дақылдарды қаржыландыру көлемі 2,6 есеге – 36 мың тоннадан 95 мың тоннаға дейін ұлғайды, деп хабарлайды kazlenta.kz тілшісі ҚР АШМ баспасөз қызметіне сілтеме жасап.
Жалпы күзгі егін жинау науқанынан кейін ауыл шаруашылығы тауарын өндірушілер ұлттық астық операторының ресурстарына 479,8 мың тонна астық және майлы дақыл өнімдерін жеткізеді. Оның 337,3 мың тоннасы немесе шамамен 70%-ы бидай болады. Қалған көлемді маржасы жоғары дақылдар – майлы зығыр, арпа, күнбағыс, рапс және жүгері құрайды.
2026 жылғы егіс науқаны барысында ауыл шаруашылығы тауарын өндірушілер күнбағыс егілетін алқаптардың көлемін едәуір ұлғайтты. Егер өткен аграрлық маусымда форвардтық келісімшарттар аясында 19,9 мың тонна күнбағыс тұқымын сатып алуға қаржы бөлінсе, биыл келісімшарт жасалған өнім көлемі екі есеге жуық артып, 37,8 мың тоннаға жетті.
Дәстүрлі түрде «Азық-түлік келісімшарт корпорациясының» ресурстарына ең көп өнімді еліміздің астық белдеуіндегі шаруашылықтар жеткізеді. Қостанай облысының аграршылары 228,6 мың тонна астық және майлы дақыл өнімдерін, Солтүстік Қазақстан облысының ауыл шаруашылығы тауарын өндірушілері – 162 мың тонна, ал Ақмола облысының агрокәсіпорындары 68,3 мың тонна өнім жеткізеді.
Алматы облысы мен өзге де оңтүстік өңірлердегі ауыл шаруашылығы тауарын өндірушілерге мемлекеттік қолдау шараларын кеңейту мақсатында агроөнімдерді форвардтық қаржыландыру бағдарламасына жүгері сатып алу енгізілді. Қаржыландырылатын дақылдар тізімінің кеңеюі фермерлерге нарықтағы сұраныстың өзгерістеріне жедел ден қойып, өсімдік шаруашылығындағы сұранысқа ие әрі рентабельді бағыттарды дамытуға мүмкіндік берді.