Алмалы ауданында тұрғын үйлердің қасбетін бірыңғай қалалық дизайн-кодқа сәйкес жаңарту жұмыстары жалғасуда. Қазіргі таңда Назарбаев даңғылы, 161 және Шевченко көшесі, 51 мекенжайларындағы тұрғын үйлердің қасбеттін жаңарту жұмыстары толық аяқталды, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Жалпы ауданда 60 тұрғын үйдің қасбетін жаңарту жоспарланған. Жөндеу барысында ғимараттардың құрылымдық ерекшеліктері ескеріледі: бірінші қабатта вандализмге төзімді гранит қолданылса, жоғарғы қабатта салмағы жеңіл әктас пайдаланылады. Бұл ғимараттардың көтергіш құрылымына түсетін жүктемені азайтуға мүмкіндік береді. Сондай-ақ, сәулеттік шешімдер мен қолданылатын материалдар алдын ала тұрғындармен келісілген.
Жаңғырту жұмыстарының соңғы кезеңінде сәулеттік жарықтандыру жүйесі орнатылады. Ол ғимараттардың тарихи келбетін айшықтап, көшелердің жарықтандырылуын жақсартуға ықпал етеді.