Алматыда қаланың тарихи келбетін сақтай отырып, оның сыртқы көрінісін жаңартуға бағытталған тұрғын үйлердің қасбетін жаңарту бойынша ауқымды бағдарлама жалғасуда, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Жобаның негізгі мақсаты — ғимараттардың сәулеттік болмысын бұзбай, олардың сыртқы келбетін ұқыпты түрде қалпына келтіру, сондай-ақ пайдалану сапасын жақсарту. Әсіресе, 1950-жылдардың соңында салынған, қаланың басты көшелерінде орналасқан және қалалық кеңістіктің көркем бейнесін айқындайтын үйлерге баса назар аударылады.
Бағдарлама кешенді тәсілді қамтиды: қасбеттерді жаңарту, жылу және дыбыс оқшаулауын жақсарту, ылғалдан қорғау, сондай-ақ ғимараттардың тарихи ерекшеліктерін сақтай отырып, заманауи әрі ұзақ мерзімді материалдарды қолдану. Барлық жұмысты арнаулы ұйымдар қалалық қызметтің бақылауымен жүргізеді және жобалар тұрғындармен міндетті түрде талқыланады. Сонымен қатар материалдардың сапасына, экологиялық тазалығына және климаттық жағдайға төзімділігіне ерекше мән беріледі.