Жамбыл облысында Жедел басқару орталығының бейнекамераларының көмегімен 52 қылмыс ашылып, 19,5 мыңға жуық әкімшілік құқық бұзушылықтың жолы кесілді, — деп хабарлайды kazlenta.kz тілшісі Polisia.kz сайтына сілтеме жасап.
Заманауи технологиялар қоғамдық және жол қауіпсіздігін қамтамасыз етуде полиция қызметіне тиімді қолдау көрсетуді жалғастыруда. Жыл басынан бері Жамбыл облысының полиция департаменті Жедел басқару орталығының бейнебақылау камераларының көмегімен 52 қылмыс ашылды. Сонымен қатар, облыстағы қоғамдық орындар мен автожолдарды тәулік бойы бақылаудың нәтижесінде 19 460 әкімшілік құқық бұзушылықтың жолы кесілді. Оның ішінде 156 ұсақ бұзақылық фактісі және алкогольдік ішімдіктерді ішу немесе қоғамдық орындарда масаң күйде жүрудің 36 дерегі анықталды.
Полиция қызметкерлері жол қозғалысы қауіпсіздігін қамтамасыз етуге ерекше көңіл бөлуде. Зияткерлік бейнебақылау жүйесінің көмегімен Жол қозғалысы қағидаларын бұзудың 19 205 дерегі тіркелді. Ең жиі кездесетін құқық бұзушылықтардың қатарында қауіпсіздік белдігін тақпай көлік құралын басқару, көлік жүргізу кезінде телефонды пайдалану, сондай-ақ тоқтау және тұраққа қою қағидаларын бұзу бар. Жедел басқару орталығы тәулік бойы үздіксіз жұмыс істейді. Бейнебақылау жүйесі оқиғаларға жедел ден қоюға, құқық бұзушылықтарды уақытылы анықтауға, полиция жасақтарының іс-қимылын үйлестіруге және Жамбыл облысы тұрғындарының қауіпсіздігін қамтамасыз етуге мүмкіндік береді.