Ұлытау облысында “Қауіпсіз жол” іс-шарасының екі күнінде 300-ге жуық жол ережесін бұзу дерегі анықталды, деп хабарлайды kazlenta.kz тілшісі Polisia.kz сайтына сілтеме жасап.
Жол-көлік оқиғаларының алдын алуға бағытталған “Қауіпсіз жол” жедел-профилактикалық іс-шарасы жалғасып жатыр. Іс-шараның алғашқы екі күнінде жол қозғалысы қағидаларын бұзудың 300-ге жуық дерегі тіркелді. Анықталған құқық бұзушылықтардың ішінде үш жүргізуші көлік құралын мас күйінде басқарғаны үшін әкімшілік жауапкершілікке тартылды. Бұдан бөлек, көлік жүргізу кезінде телефон пайдалану, қауіпсіздік белдігін тақпау, қарсы қозғалыс жолағына шығу және жол қозғалысы қағидаларын өзге де өрескел бұзу фактілері анықталды.
Жыл басынан бері өңірде 92 жол-көлік оқиғасы тіркелген. Соның салдарынан 141 адам түрлі дене жарақатын алған, олардың 28-і кәмелетке толмағандар. Полиция қызметкерлері жүргізушілер мен жаяу жүргіншілерді жол қозғалысы қағидаларын қатаң сақтауға шақырады. Жылдамдық режимін сақтау, қауіпсіздік белдігін тағу, көлік басқару кезінде ұялы телефонды пайдаланбау және мас күйінде рөлге отырмау – жолдағы қауіпсіздіктің басты кепілі. “Қауіпсіз жол” жедел-профилактикалық іс-шарасы облыс аумағында белгіленген мерзімге дейін жалғасады.