Абай облысында жол қозғалысы қауіпсіздігін арттыруға бағытталған заманауи технологияларды енгізу жалғасуда, - деп хабарлайды kazlenta.kz тілшісі Polisia.kz сайтына сілтеме жасап.
Туристік маусым қарсаңында Алакөл көлі жағалауына апаратын республикалық маңызы бар Омбы – Майқапшағай автомобиль жолының Жарма ауданы Қалбатау ауылы маңында жүргізушілерге арналған инновациялық визуалды бағдарлау жүйесі іске қосылды. Жаңа қондырғы жолдың үстіне және тікелей жол жамылғысына жарқын лазерлік сәулелерді проекциялап, жол қозғалысына қатысушылар үшін қосымша көрнекі бағдар қалыптастырады. Бұл жүргізушілерге түнгі уақытта, сондай-ақ тұман, жаңбыр немесе түтін сияқты қолайсыз ауа райы жағдайларында жол бағытын жақсырақ қабылдауға мүмкіндік береді. Омбы – Майқапшағай трассасы еліміздің негізгі көлік артерияларының бірі және Қазақстан, Ресей мен Қытай арасындағы жүк және жолаушы тасымалын қамтамасыз ететін халықаралық көлік дәлізіне кіреді.
Жаз мезгілінде Алакөл көліне баратын туристер ағынының артуына байланысты бұл бағытта қозғалыс қарқындылығы айтарлықтай көбейеді. Апат қаупі жоғары және көлік қозғалысы көп учаскелерде заманауи техникалық шешімдерді енгізу жол-көлік оқиғаларының алдын алуда маңызды рөл атқарады. Лазерлік жүйені қолдану жол қозғалысы қауіпсіздігін арттырып, апаттық жағдайлардың туындау қаупін азайтып, жүргізушілер үшін қолайлы жағдай жасауға мүмкіндік береді. Абай облысында заманауи технологияларды енгізу және жол инфрақұрылымын жетілдіру жұмыстары жалғасын табады.