Шымкентте 21 жастағы Нұрай Серікбайдың аяусыз өлтірілуіне қатысты сотқа дейінгі тергеу амалдары аяқталды, деп хабарлайды kazlenta.kz тілшісі Tengrinews.kz сайтына сілтеме жасап.
Аянхан Омаровтың айтуынша, жәбірленуші тарап қылмыстық істің 7 томымен танысып, олардың көшірмесін алған.
Қайғылы оқиға 11 қаңтарда болды. Бейнебақылау камералары күдіктінің Нұрайдың соңынан еріп барып, пышақ жарақатын салғанын тіркеген. Сондай-ақ қанды оқиғаға дейін бірнеше ай бойы сталкинг (аңду) және алып қашу деректері болғаны анықталды."Іс бойынша тергеу амалдары аяқталды. Қазіргі уақытта процеске қатысушылардың қылмыстық іс материалдарымен танысуы жалғасып жатыр. Бұл процедура аяқталғаннан кейін іс сотқа жолданады. Танысу барысы туралы қосымша ақпарат кейінірек беріледі", – деді адвокат.
Сәуірде күдікті тергеу изоляторынан Алматы облысы Ақтас ауылындағы мамандандырылған психиатриялық ауруханаға ауыстырылған болатын.
Отбасының адвокатының бұған дейін берген мәліметі бойынша, 28 жастағы күдіктіге қатысты бірқатар сараптама тағайындалып, ол мамандардың бақылауымен қарқынды ем қабылдаған.
Осы ретте қаза тапқан қыздың туыстары күдікті жүйке ауруын сылтауратып, қылмыстық жауапкершіліктен жалтаруы мүмкін деп қауіптенген еді.
Алайда 30 сәуірде ішкі істер министрінің орынбасары Санжар Әділов сот-психиатриялық сараптамасының қорытындысы бойынша күдіктінің ақыл-есі дұрыс деп танылғанын хабарлады.