Алматы облысының Жамбыл ауданында құны 450 млн теңге болатын балық өсіру шаруашылығы пайдалануға берілді. Жобаның инвесторы — «ТехноСнаб 2002» компаниясы. Кәсіпорында жылына 200 тоннаға дейін тауарлық балық пен 2 млн шабақ өсіру жоспарланған, деп хабарлайды kazlenta.kz тілшісі ҚР АШМ баспасөз қызметіне сілтеме жасап.
Нысанның жалпы аумағы 1500 шаршы метрді құрайды. Жоба бекіре тұқымдас балықтар мен форельді өсіруге, өндіруге және кейіннен өңдеуге бағытталған. Қазіргі таңда шаруашылық бассейндеріне форель шабақтары жіберілді. Ал бекіре тұқымдас балықтарды өсіру жобаны іске асырудың келесі кезеңінде қолға алынады.
Кәсіпорында тұйық сумен жабдықтау жүйесі енгізілген. Аурулардың алдын алу және экологиялық таза, сапалы өнім өндіру мақсатында көпсатылы сүзгілеу, озондау және ультракүлгін сәулемен залалсыздандырудың заманауи технологиялары қолданылады. Су сапасы, оттегі деңгейі, температуралық режим мен санитарлық жағдай тұрақты бақылауда болады.
Жаңа нысан өңірдегі балық шаруашылығын дамытуға бағытталған кешенді жұмыстың бір бөлігіне айналды. Қазіргі уақытта облыста тауарлық балық өсірумен 53 шаруашылық айналысады. Олардың жалпы өндірістік қуаты жылына 11 мың тонна өнімді құрайды.
Еске салсақ, 2026 жылғы 1 қаңтардан бастап Қазақстанда балық шаруашылығы саласын мемлекеттік қолдаудың жаңа тетіктері енгізілді. Атап айтқанда, акваөсіру саласын дамытуға арналған арнайы субсидиялар қарастырылған.