Жетісу облысында инертті материалдарды заңсыз өндіру мен тасымалдаудың 20-дан астам дерегі анықталды, - деп хабарлайды kazlenta.kz тілшісі Polisia.kz сайтына сілтеме жасап.
Жетісу облысы полиция департаментінің табиғатты қорғау полициясы қызметкерлері инертті материалдарды заңсыз өндіру және тасымалдау фактілерін анықтау мен жолын кесу бағытындағы жүйелі жұмыстарды жалғастыруда. Жыл басынан бері өңір аумағында құм, қиыршық тас және өзге де инертті материалдарды заңсыз өндіру мен тасымалдаудың 21 дерегі анықталып, жолы кесілді.
Мәселен, 16 мамыр күні түнгі уақытта Талдықорған – Үштөбе автожолының Еңбек ауылы маңында жүк көлігін тексеру барысында тиісті рұқсат құжаттарынсыз шамамен 10 тонна қиыршық тас тасымалдау фактісі анықталды. Сондай-ақ сол түні Алматы – Өскемен автожолының Көксу ауданы аумағында полицейлер құмды қажетті ілеспе құжаттарсыз тасымалдап келе жатқан жүк көлігін тоқтатты. Аталған екі дерек бойынша материалдар заңнама талаптарына сәйкес тіркелді. Қазіргі уақытта тексеру іс-шаралары жүргізілуде. Оның қорытындысы бойынша қолданыстағы заңнамаға сәйкес процессуалдық шешім қабылданатын болады. Жиналған материалдар одан әрі қарау және тиісті шара қабылдау үшін уәкілетті органға жолданады.
- Инертті материалдарды заңсыз өндіру мен тасымалдау қоршаған ортаға айтарлықтай зиян келтіріп, табиғатты қорғау заңнамасының талаптарын бұзады. Бұл бағыттағы жұмыстар тұрақты бақылауда болады, ал мұндай құқықбұзушылықтар дер кезінде анықталып, жолы кесілетін болады, – деп атап өтті полицияның баспасөз қызметі.