ҚР АШМ Жер ресурстарын басқару комитетінің Солтүстік Қазақстан облысы Жер ресурстарын басқару департаментінің жоспардан тыс тексеруі барысында Шал ақын ауданында жалпы аумағы 105 гектарды құрайтын жер телімінің заңсыз берілгені анықталды, деп хабарлайды kazlenta.kz тілшісі ҚР АШМ баспасөз қызметіне сілтеме жасап.
Аталған жер учаскесі елді мекен шегінде орналасқан, бау-бақша шаруашылығын жүргізу үшін берілгенімен, іс жүзінде қоғамдық жайылым жерлер есебінен бөлінгені белгілі болды.
Қолданыстағы жер заңнамасына сәйкес, жайылымдар, оның ішінде ортақ пайдаланудағы жайылымдар, жеке меншікке немесе жер пайдалануға берілмейді. Мұндай жерлер тек халықтың жеке қосалқы шаруашылықтарында ауыл шаруашылығы жануарларын жаюға арналған.
Анықталған заң бұзушылықты жою мақсатында департамент Солтүстік Қазақстан облысының мамандандырылған ауданаралық экономикалық сотына жер учаскесін жалдау шартын жарамсыз деп тану туралы талап-арыз жолдады.
Нәтижесінде сот талап қоюды толық көлемде қанағаттандырды. Сот актісі заңды күшіне еніп, жер телімі мемлекеттік жер қорына қайтарылды.