Астана қаласының әкімі Жеңіс Қасымбек Instagram парақшасында биыл салынатын және жөндеу жүргізілетін көшелер туралы жазды, деп хабарлайды kazlenta.kz тілшісі елорда әкімдігінің ресми сайтына сілтеме жасап.
«Қалада ауа райы жылынған күннен бастап жолдарды жөндеу және салу жұмысы қолға алынды. Биыл жалпы ұзындығы 60 км болатын шамамен 50 көшені жөндеу жоспарланған. Сол сияқты шұңқырларды, тротуарларды жөндеу, жол белгілерін салу және т.б. жұмыс қатар жүргізіліп жатыр.
Осылайша, биыл сәуір айынан бастап мына көшелерде жұмыс басталды:
- Е68 көшесі Ә. Бектұров көшесінен Төле би көшесіне дейін;
- Б. Соқпақбаев көшесінің Ш. Бейсекова көшесінен К. Күмісбеков көшесіне дейінгі аралығындағы құрылысы жалғасты;
- «Тілендиев даңғылынан Бейбарыс Сұлтан көшесіне дейінгі учаскеде Абайдың 150 жылдығы көшесін салу» жобасы іске асып жатыр.
- Мәңгілік Ел даңғылы мен Сығанақ көшесі;
- Кенесары көшесі Ә. Сембинов көшесінен Сарыарқа даңғылына дейін (бұл ретте Кенесары көшесінде 2025 жылы Е. Брусиловский көшесінен Ә. Сембинов көшесіне дейінгі аралықта жұмыс жүргізілген);
- Республика даңғылы А. Иманов көшесінен теміржол вокзалына дейін;
- Ақан сері көшесі Тілендиев даңғылынан Қараменде би Шақаұлы көшесіне дейін;
- Шаймерденов көшесі Нәжімеденов көшесінен А. Байтұрсынұлы көшесіне дейін және т.б.
Бейсекова мен Тілендиев көшелерінің қиылысында екі деңгейлі жол айрығын салу жұмысы жүріп жатыр. Нысанда инженерлік желілерді тарту және аралық металл құрылымын монтаждау жұмысы жүргізілуде. Биыл жыл соңына дейін құрылыс жұмысын аяқтау жоспарланып отыр.
Қ. Мұхамедханов көшесінің құрылысы Ш. Айтматов көшесінен Қорғалжын тасжолына дейінгі аралығында жалғасып жатыр.
Өткен жылы бұл учаскеде көлік қозғалысы қамтамасыз етілген. Биыл жол салуды және іргелес аумақты абаттандыруды қоса алғанда, барлық жұмысты толықтай аяқтау жоспарланып отыр.
Ш. Айтматов көшесінде сегіз жолақты магистральді жол арқылы көлік қозғалысы қамтамасыз етілді. Айтматов көшесінің ашылуы нәтижесінде Тұран және Қабанбай батыр даңғылдары, сондай-ақ Сығанақ пен Қ. Мұхамедханов көшелері сияқты негізгі магистральдарда көлік ағыны едәуір азайды, бұл қаланың жаңа бөлігі үшін аса маңызды.
Сонымен қатар, биыл абаттандыру, бағдаршам орнату және электрмен жабдықтау, нөсер кәрізі желілерін тарту жұмысы жалғасады.
Тәуелсіздік даңғылының Қабанбай батыр даңғылынан Ұлы Дала даңғылына дейінгі учаскесінің құрылысы басталды.
Бұл көше сегіз жолақты магистраль болып саналады.
Аталған жолдың арқасында көлік ағыны қайта реттеліп, Мәңгілік Ел мен Тұран даңғылдарында қозғалыс жылдамдайды деп күтіліп отыр.
Қазіргі уақытта 1-кезең жүзеге асып жатыр – Тәуелсіздік даңғылының Қабанбай батыр даңғылынан Е485 көшесіне дейінгі учаскесінің аралығы.
Жол салу аумағында нормативтік талаптарға сәйкес коммуналдық желілерді (сумен жабдықтау, кәріз, электрмен, жылумен жабдықтау) төсеу жұмысы жүргізіліп жатыр.
Ұлы Дала даңғылының (А-52 көшесі) Ш. Қалдаяқов көшесінен Қордай көшесіне дейінгі учаскесінде құрылыс жұмысы жүргізіліп жатыр.
Осыған дейін Ш. Қалдаяқов көшесінен А. Байтұрсынұлы көшесіне дейінгі аралықта көлік қозғалысы қамтамасыз етілген. Қазіргі уақытта осы учаскеде жолдың жоғарғы қабатын салу арқылы абаттандыру жұмысы жүргізіліп жатыр», – деп жазды Жеңіс Қасымбек.