Жетісу облысында жазғы туристік маусым қарсаңында Алакөл жағалауындағы қауіпсіздік шаралары күшейтілді. Өңірге жұмыс сапарымен келген үкімет өкілдері демалыс орындарының дайындығын тексерді, – деп хабарлайды kazlenta.kz тілшісі Polisia.kz сайтына сілтеме жасап.
Жетісу облысында жазғы туристік маусымға дайындық қарқынды жүргізіліп жатыр. Жұмыс сапары аясында Алакөл жағалауына Қазақстан Республикасы премьер-министрінің орынбасары – мәдениет және ақпарат министрі Аида Балаева мен туризм және спорт министрі Ербол Мырзабосынов барды. Олар өңірдегі туристік инфрақұрылымның даму барысымен танысып, демалыс орындарының жағдайын тексерді. Делегация құрамында сондай-ақ орталық мемлекеттік органдардың, үкімет аппаратының және салалық ведомстволардың өкілдері, сондай-ақ Жетісу облысының әкімі Бейбіт Исабаев болды.
Сапар барысында демалушылардың қауіпсіздігін қамтамасыз ету мәселесіне ерекше назар аударылды. Жетісу облысы полиция департаментінің қызметкерлері туристердің көптеп келу кезеңінде құқықтық тәртіпті қамтамасыз етуге күштер мен құралдардың толық дайын екенін баяндады. Алакөл жағалауында тәулік бойы шамамен полиция қызметкерлері қоғамдық тәртіпті қамтамасыз етеді. Бақылау тиімділігін арттыру мақсатында 40-қа жуық ұшқышсыз ұшу аппараты (дрон) пайдаланылады. Бұл құқық бұзушылықтардың алдын алып, азаматтардың қауіпсіздігін жоғарыдан бақылауға мүмкіндік береді. Сонымен қатар жол қозғалысы қауіпсіздігі күшейтіліп, жол ережелерін бұзуға нөлдік төзімділік қағидаты қатаң сақталады.
Ведомствоның мәліметінше, басты мақсат – туристер мен өңір тұрғындары үшін барынша қауіпсіз жағдай жасау. Алакөл жағасындағы демалыс тек жағымды әсер сыйлауы тиіс.