Алматының Жетісу ауданында халық санының өсуіне және оқушы орындарының тапшылығын азайтуға байланысты әлеуметтік инфрақұрылымды дамыту жұмыстары жалғасып жатыр. Бұл туралы аудан әкімі Ләззат Жылқыбаева Өңірлік коммуникациялар қызметінде өткен брифинг барысында мәлімдеді, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
«Келешек мектептері» ұлттық жобасы аясында Боралдай көшесінің бойында салынған №225 мектептің құрылысы толық аяқталды. 1200 орынға арналған жаңа білім ордасын жаңа оқу жылының басында ашу жоспарланып отыр.
Сонымен қатар, шілде айының соңына дейін №112 мектепке салынған 300 орындық қосымша ғимараттың құрылысы аяқталады. Ал желтоқсанда №43 мектепті қайта жаңғырту жұмыстары тәмамдалып, 280 орындық қосалқы нысан пайдалануға беріледі.
Ауданда қосымша білім беру жүйесі де қарқынды дамып келеді. Құлагер шағынауданында балалардың ғылым, техника, өнер, экология және спорт бағыттары бойынша білім алып, шығармашылығын дамытуына мүмкіндік беретін Инновациялық шығармашылық орталығын салуға арналған жер телімі анықталды.
Сондай-ақ, «DAMU Bala» бағдарламасы аясында ауданда қосымша білім беру қызметін ұсынатын 78 ұйым жұмыс істеп тұр. Бүгінде олар шамамен 5 мың балаға қызмет көрсетеді.