Премьер-Министр Олжас Бектеновтің төрағалығымен Үкімет отырысында облыс әкімі Серік Шәпкенов автомобиль жолдарының сапасын арттыру және анықталған кемшіліктерді жою бағытындағы жұмыстар жөнінде баяндады, деп хабарлайды kazlenta.kz тілшісі Атырау облысы әкімдігінің баспасөз қызметіне сілтеме жасап.
Өңірдегі автомобиль жолдарының жалпы ұзындығы 6 542 шақырымды құрайды. 2025 жылы 45 елді мекенде 78 жоба іске асырылды (республикалық бюджет есебінен — 7,9 млрд теңге, жергілікті бюджеттен — 59,2 млрд теңге). 235 шақырым жол жөнделіп, нәтижесінде жақсы және қанағаттанарлық жағдайдағы жолдардың үлесі 83%-ға жетті. Биыл бұл көрсеткішті 86%-ға дейін арттыру көзделген.
Сапаны бақылауға ерекше назар аударылуда. «Жол активтерінің ұлттық сапа орталығы» РМК арқылы зертханалық сынақтар күшейтіліп, техникалық қадағалау тартылды. Осы мақсатта жергілікті бюджеттен 370 млн теңге бөлініп, 78 жоба 100%-ға тексерумен қамтылды.
2025 жылғы мониторинг барысында 484 ақау анықталды (175 негізгі және 309 ұсақ). Оның 150-ге жуығы мердігер ұйымдардың кепілдік міндеттемелері аясында жойылды. Нысандар ақаулар толық қалыпқа келтіріліп, орталық оң қорытынды бергеннен кейін ғана қабылданады.
Жол жабынын сақтау мақсатында рұқсат етілген жүктемені бақылауға арналған автоматтандырылған өлшеу станцияларын (АӨС) енгізу жалғасуда. Облыстық маңызы бар жолдарда жоспарланған төрт құрылғының үшеуі пайдалануға берілді, биыл тағы біреуін орнату жоспарланған. Атап айтқанда, «Атырау–Индер» автожолында үш станция орнатылған, сондай-ақ «Миялы–Сағыз» жолына АӨС қондыру көзделген.
Республикалық маңызы бар тасжолдарда тоғыз автоматтандырылған өлшеу құрылғысын орнату жоспарланған: оның екеуі орындалды, қалған жетеуінің монтажын биыл бастап, келесі жылы пайдалануға беру көзделіп отыр.
Жол инфрақұрылымын дамыту және бюджет қаражатын тиімді пайдалану мәселесі облыс әкімінің тұрақты бақылауында.