Алматы әкімінің орынбасары Олжас Смағұлов креативті индустрия саласының өкілдерімен жұмыс кездесуін өткізді. Басқосуға Мемлекеттік кірістер департаменті мен қаланың Туризм басқармасының өкілдері де қатысты, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Кездесу барысында креативті индустрияны дамытуға бағытталған қаланың стратегиялық жобалары таныстырылды. Сала өкілдері осы бағыттағы қалалық саясаттың негізгі бастамаларымен және басымдықтарымен танысты.
Сонымен қатар, қатысушылар креативті сектордың дамуына кедергі келтіріп отырған негізгі түйткілдерді, мемлекеттік қолдау тетіктерін, сондай-ақ бизнес пен мемлекеттік органдар арасындағы өзара ынтымақтастықтың форматтарын талқылады.
Креативті индустрия Алматыны дамыту бағдарламасы аясында экономиканы әртараптандырудың және заманауи қалалық ортаны қалыптастырудың маңызды құралдарының бірі ретінде айқындалған. Осы тұрғыда саланың қаладағы жалпы өңірлік өнімге қосатын үлесін 2030 жылға қарай кезең-кезеңімен 4 пайызға дейін арттыру жоспарлары қаралды.
Кездесу қорытындысы бойынша тараптар креативті бастамалардың дамуына қолайлы жағдай жасаудың және бизнес пен мемлекеттік құрылымдар арасындағы тұрақты өзара іс-қимылды жолға қоюдың маңызын атады. Бұл өз кезегінде Алматының өңірлік мәдени орталық ретіндегі мәртебесін нығайтуға ықпал етпек.