Ақмола облысында ұландықтар жол жиегіне шығып кеткен жүргізушіге көмек көрсетті, – деп хабарлайды kazlenta.kz тілшісі Polisia.kz сайтына сілтеме жасап.
Ақмола облысындағы Ақкөл – Степногорск автожолында ауа райының қолайсыздығы салдарынан жолға шыққан азамат қиын жағдайға тап болды. Тайғақ жолда автокөлік басқаруға көнбей, жол жиегіндегі қарлы жыраға сырғып кеткен. Қалың қарға батқан көлік өздігінен шыға алмай қалған. Сол мезетте көлік жүргізушісіне осы бағытпен әскери тапсырманы орындау барысында келе жатқан Қазақстан Республикасы Ұлттық ұланының 3517 әскери бөлімінің қызметкерлері кезіккен. Ұландықтар жағдайды көріп, жедел түрде арнайы әскери техниканың көмегімен көлікті қарлы жырадан шығарып алды.
Ұландықтардың арқасында автокөлік жолға шығарылып, жүргізуші әрі қарай қозғалысын жалғастырды. Көмек алған азамат әскери қызметкерлерге алғысын білдірді. Әскери бөлім басшылығы мұндай жағдайлар адам өмірі мен қауіпсіздіктің маңызын көрсететінін атап өтті. Сондай-ақ әскери қызметшілер әрдайым халыққа көмек көрсетуге дайын екенін жеткізді.