12 қыркүйек күні Х.Бөкеева атындағы қазақ драма театрында Орал қаласы мәдениет және тілдерді дамыту бөлімі қолдауымен ҚР Тәуелсіздігінің 30 жылдығы аясында және «Қала күні-2021» мерекесіне орай «Қарақат» мектеп-студиясы шәкірттерінің «Оралым – өнер самғаған» атты мерекелік концерті өтті, деп хабарлайды kazlenta.kz.
«Мәдени-ағарту бірлестігі» ұйымдастыруымен өткізілген шараға қалалық мәдениет және тілдерді дамыту бөлімі басшысы С.Қайрлиев қатысып, арнайы қала әкімі А.Шынбековтың атынан «Қарақат» мектеп-студиясының ұжымына алғыс хат табыс етті. Бүгінде 13 жылдық тарихы бар “Қарақат” мектеп студиясы талай жеткіншекті білім нәрімен сусындатып, өміріне бағыт-бағдар беретін өнер мектебі ретінде қызмет атқаруда. Аталмыш мектеп қазіргі таңда еліміздің 12 қаласында жұмыс жасап, жеткіншектерге қазақтың ән өнерін дәріптеуге өз үлесін қосып келеді.
Сонымен қатар қала күні мерекесі аясында Орал қаласындағы Оқушылар сарайы жаңа оқу жылын салтанатты түрде ашты. Осы ретте сарайда «Бақытты балалар – Тәуелсіз елдің тірегі!» атты шара ұйымдастырылып, «Сәулет ғимараттары – сыр шертеді» тақырыбында көрме қойылды. Ашық алаңда өткізілген шараға қалалық білім беру бөлімі басшысының орынбасары Айтжан Даумова, облыстық мәслихат депутаты Ляна Тұрсынова, қамқоршылық кеңестің мүшелері, үйірмелердің тәрбиеленушілері мен ата-аналар қатысты.
Сарай директоры Шолпан Сисенова Тәуелсіздігіміздің 25 жылдығына орай ашылған оқушылар сарайының бес жыл қатарынан қызмет етіп келе жатқанын айтып өтті. Биыл мұнда 83 үйірме жұмыс жасайтын болады. Оның ішінде «Ұшқыр ой алаңы» дебаттық қозғалысы, волонтерлық қозғалыс, «Мақашева театры» сынды жаңа үйірмелер, математика, физика, химия, география, биология пәндері бойынша зерттеу алаңдары жұмысын бастамақ. Жалпы биылғы оқу жылында 4 мыңдай оқушы қамтылатын болады.
Шараға қатысқан Батыс Қазақстан облыстық мәслихатының депутаты, «Nur Otan» партиясының «Отбасы, әйелдер және балалардың құқықтарын қорғау» мәселелері жөніндегі кеңес төрағасы Ляна Тұрсынова тәрбиеленушілер мен ата-аналарды жаңа оқу жылының басталуымен құттықтап, балалардың сапалы білім алуын, қосымша біліммен қамтылуын назарда ұстайтынын жеткізді. Қалалық білім беру бөлімі басшысының орынбасары Айтжан Даумова өз кезегінде оқушылар сарайында балалардың жан-жақты дамуына барлық жағдай жасалғанын айтып өтті. Атап айтсақ, спорт, өнер, интеллектуалдық даму мен оқу сауаттылықтарын жетілдіру бағытында түрлі шаралар ұйымдастырылып жатқандығын тілге тиек етті. Осы орайда сарай жұмысын қадағалап, ұйымдастыруға үлес қосып жүрген сарай директоры Шолпан Серікқалиқызына бөлім басшысы Ақжарқын Темірханованың атынан алғыс хат табыстады.
Шара сарай өнерпаздарының концерттік бағдарламасымен жалғасын тапты. Сондай-ақ ата-аналар мен балалар оқушылар ғимараты алдына «Қала күні» мерекесі аясында арнайы қойылған «Сәулеттік ғимараттар сыр шертеді» атты Орал қаласы білім беру ұйымдарындағы технология пәні мұғалімдері дайындаған шаһардағы тарихи нысандар мен жаңа ғимараттардың макеттік үлгілері және болашаққа арналған макеттер көрмесімен танысты. Ұстаздар әр ғимараттың тарихы туралы түсінік беріп өтті. Көрме 19 қыркүйекке дейін жалғасатын болады. Шаһарымызда «Қала күні» мерекесі аясында басқа да түрлі шаралар ұйымдастырылуда.