Жетісу облысында заманауи шағын жедел басқару орталығы ашылды, – деп хабарлайды kazlenta.kz тілшісі Polisia.kz сайтына сілтеме жасап.
Жетісу облысының Қаратал ауданында қоғамдық қауіпсіздік жүйесінің заманауи цифрлық өзегі кіші жедел басқару орталығы ашылды. ЖБО ашылуымен ауданның ең қарбалас және стратегиялық маңызды нүктелеріне орнатылған 77 бейнебақылау камерасы мен 5 жылдамдық өлшеу құрылғысы жұмыс істей бастады. Жаңа жүйе полицияға тәулік бойы көшелердегі жағдайды бақылауға, құқық бұзушылықтарды дер кезінде анықтап, оқиғаларға жедел әрекет етуге мүмкіндік береді. Орталықтың құрылуы "Ақылды полиция" тұжырымдамасын жүзеге асырудағы маңызды қадам болды. Енді құқық қорғау қызметкерлері жағдайды нақты уақыт режимінде көріп, кезекші жасақтардың әрекеттерін үйлестіріп, шешім қабылдауды жеделдетеді. Аталған шараға Қаратал ауданының әкімдігінің өкілдері де қатысып, жаңа орталықтың ашылуы ауданның қауіпсіздік деңгейін арттыруға, құқық бұзушылықтардың алдын алуға және тұрғындардың тыныштығын қамтамасыз етуге зор үлес қосатынын атап өтті.
Кішігірім жедел басқару орталығы – бұл тек техникалық нысан ғана емес, тұрғындардың қорғаны мен сенімінің жаңа нышаны. Ол әр азаматтың өмірі, мүлкі мен тыныштығы сенімді бақылауда екенінің кепілі.