Қазақстан Республикасы Премьер-министрінің орынбасары – Сыртқы істер министрі Мұрат Нұртілеу БҰҰ Бас Ассамблеясының 80-ші мерейтойлық сессиясына қатысу аясында шет мемлекеттердің сыртқы саяси ведомстволарының басшыларымен бірқатар екіжақты кездесу өткізді, деп хабарлайды kazlenta.kz тілшісі ҚР Сыртқы істер министрлігіне сілтеме жасап.
АҚШ Президентінің Арнайы тапсырмалар жөніндегі өкілі Ричард Гренеллмен өткізілген келіссөздер барысында тараптар қазақ-американ ынтымақтастығының негізгі бағыттарын, соның ішінде сауда және инвестиция салаларындағы перспективаларды талқылады. Сондай-ақ, мәдени-гуманитарлық байланыстарды дамытуға және жаһандық әрі өңірлік күн тәртібіндегі өзекті мәселелер бойынша пікір алмасуға ерекше көңіл бөлінді.
Ресей Федерациясының Сыртқы істер министрі Сергей Лавровпен кездесу барысында екіжақты ынтымақтастықтың өзекті мәселелері, соның ішінде алдағы ресми сапарлар, атап айтқанда Қазақстан Президенті Қасым-Жомарт Тоқаевтың Ресейге сапарына дайындық мәселелері қаралды. Өңірлік және халықаралық күн тәртібіндегі өзекті мәселелер, сондай-ақ халықаралық ұйымдар аясындағы өзара іс-қимыл жөнінде пікір алмасты.
Польша Республикасының Сыртқы істер министрі Радослав Сикорскиймен кездесуде саяси және сауда-экономикалық ынтымақтастықтың қазіргі жай-күйі мен келешегі қарастырылып, бұрын қол жеткізілген уағдаластықтарды іске асырудың маңыздылығы аталып өтті.
Әзербайжан Республикасының Сыртқы істер министрі Джейхун Байрамовпен кездесу барысында тараптар стратегиялық серіктестікті дамыту және барлық негізгі бағыттар бойынша өзара тиімді екіжақты ынтымақтастықты кеңейтуге бейілділігін растады.
Мажарстанның Сыртқы істер министрі Петер Сийяртомен өткен келіссөздерде тарихи тамырлар мен дәстүрлі достыққа негізделген стратегиялық серіктестікті одан әрі тереңдетуге мүдделілік білдірілді. Саяси, экономикалық, энергетикалық және мәдени-гуманитарлық ынтымақтастықтың басым бағыттары талқыланды.
Өзбекстан Республикасының Сыртқы істер министрі Бахтиёр Саидовпен өткен кездесуде екіжақты күн тәртібінің кең ауқымды мәселелері, соның ішінде саяси өзара іс-қимыл, сауда-экономикалық және инвестициялық серіктестік, сондай-ақ гуманитарлық байланыстар талқыланды. Министрлер қазақ-өзбек қарым-қатынастарының орнықты дамуына жоғары баға беріп, екі бауырлас ел арасындағы стратегиялық серіктестікті нығайтуға өзара бейілділікті қуаттады.
Кездесулердің қорытындысы бойынша тараптар өзара мүдде туғызатын барлық бағыттар бойынша конструктивті диалогты жалғастыруға келісті.