Алматыда республикалық «Учаске» жедел-алдын алу іс-шарасы барысында Түрксіб аудандық полиция қызметкерлері ірі көлемдегі есірткіні тәркіледі, деп хабарлайды kazlenta.kz тілшісі Polisia.kz сайтына сілтеме жасап.
Құқық қорғау органдарына қаладағы қонақ үйлердің бірінде тыйым салынған заттар сақталуы мүмкін деген ақпарат түскен. Тексеру кезінде тәртіп сақшылары өзіне тән иісі бар, ақшыл түсті ұнтақ салынған бірнеше түйіншекті анықтап, тәркіледі. Сонымен қатар күдіктінің көлігінен де дәл осындай бір байлам табылды.
Тәркіленген заттың жалпы салмағы 1,3 келіден асты. Қазір аталған дерек бойынша қылмыстық іс қозғалып, күдікті қамауға алынды.
– «Учаске» іс-шарасының басты мақсаты – азаматтарды қылмыстық әрекеттерден қорғау және қоғамдық тәртіпті нығайту, – деді Түрксіб аудандық полиция басқармасының бастығы Думан Аухадиев.
Полиция тұрғындарды есірткінің заңсыз айналымы туралы кез келген мәліметті дер кезінде хабарлауға шақырады және заңда қарастырылған жауапкершілікті еске салады.