БҚО-да Білім күні қоғамдық қауіпсіздікті 500-ге жуық полицей қамтамасыз етті, — деп хабарлайды kazlenta.kz тілшісі Polisia.kz сайтына сілтеме жасап.
1 қыркүйек – еліміздегі барша оқушылар мен ата-аналар үшін қуаныш пен толқынысқа толы ерекше күн. Биылғы оқу жылы облыс бойынша мыңдаған бала үшін жаңа білім сапарына жол ашты. Әсіресе мектеп табалдырығын алғаш аттаған бүлдіршіндер үшін алғашқы қоңыраудың үні өміріндегі маңызды белестердің бірі болды. Салтанатты жиындар барысында ұстаздар жас ұрпаққа ізгі тілектерін арнап, білім алудың маңыздылығын атап өтті. Ата-аналар балалардың жарқын болашағына сенім білдірді. Оқу жылының басталуына байланысты мектептерде балалардың қауіпсіздігі басты назарға алынды. Қоғамдық тәртіп пен жол қозғалысы қауіпсіздігін қамтамасыз ету мақсатында облыс бойынша 500-ге жуық полиция қызметкері жұмылдырылды. Олар мектеп маңында кезекшілік атқарып, жол қиылыстарында оқушылардың қауіпсіз өтуіне жағдай жасады. Сонымен қатар, жасөспірімдер арасында құқық бұзушылықтың алдын алу бағытында профилактикалық жұмыстар жүргізілді.
Балалардың танымдық дамуына және қауіпсіздік дағдыларын қалыптастыруға ерекше көңіл бөлінді. Арнайы Ішкі істер министрлігі әзірлеген бояу кітапшалары (раскраска) бүлдіршіндерге үлестірілді. Бұл бастама – балаларға жол ережелері мен қауіпсіздік қағидаларын ойын арқылы үйретудің тиімді тәсілі. Осыған орай, Батыс Қазақстан облысы полиция департаменті бастығының орынбасары Сұлтанғалиев Ернар Орал қаласындағы №1 мектепке арнайы барып, оқушыларға “Қауіпсіздік сабағын” өткізді. Сабақ барысында балаларға жолда жүру ережелері, төтенше жағдай кезіндегі іс-қимылдар мен полицияның қызметі түсіндірілді. Мұндай шаралар облыстың барлық мектептерінде ұйымдастырылды. Осылайша, Батыс Қазақстан облысында жаңа оқу жылы мерекелік көңіл-күймен басталып қана қоймай, оқушылардың қауіпсіздігін қамтамасыз етуге бағытталған кешенді жұмыстар атқарылды. Алғашқы қоңырау жас ұрпақты білімге, ізденіске және жауапкершілікке шақырды.