Көкшетауда полицейлер бейнебақылау камераларының көмегімен тәртіп бұзған азаматтарды тіркеді, - деп хабарлайды kazlenta.kz тілшісі Polisia.kz сайтына сілтеме жасап.
Көкшетау қаласының полиция қызметкерлері қоғамдық тәртіпті бұзудың алдын алу бойынша профилактикалық жұмыстарын жүйелі түрде жалғастыруда. Қалалық жедел басқару орталығының бейнебақылау камералары күн сайын қоғамдық орындарда орын алатын құқық бұзушылықтарды, соның ішінде қоқыс тастау, түкіру, темекі тұқылын лақтыру және алкогольді ішімдіктер ішу сияқты әрекеттерді тіркеп отырады. Полицейлердің айтуынша, мұндай теріс қылықтар да назардан тыс қалмауы тиіс. Себебі дәл осындай құқық бұзушылықтар қоғамдық тәртіп пен азаматтардың тыныштығына нұқсан келтіріп, жалпы өмір сүру сапасына теріс әсер етеді. Мұндай әрекеттердің жолын кесу және алдын алу мақсатында Ақмола облысының полиция қызметкерлері "Таза Қазақстан" экологиялық акциясын белсенді жалғастыруда. Бұл бастама тұрғындардың экологиялық мәдениетін қалыптастыруға және қоршаған ортаға ұқыпты қарауға бағытталған.
Жыл басынан бері акция аясында полиция мен өзге де құзыретті мекемелердің өкілдері 5 мыңнан астам рейдтік іс-шара өткізді. Нәтижесінде 9 мыңға жуық адам әкімшілік жауапкершілікке тартылып, абаттандыру ережелерін бұзудың 6500-ден астам және қоғамдық орындарды ластаудың 2400-ден астам дерегі анықталып, тоқтатылды. Полиция департаменті азаматтарды заңға бағынуға, қоғамдық орындарда тәртіп сақтауға және қоршаған ортаға ұқыпты қарауға шақырады. "Заң және тәртіп" қағидатын ұстанып, қоғамға зиян келтіретін кез келген заңсыз әрекеттерден аулақ болу — әрбір азаматтың жауапкершілігі.