Қазақстан Республикасының Президенті Қасым-Жомарт Тоқаевтың Түркия Республикасына ресми сапары аясында Қазақстанның Ауыл шаруашылығы министрі Айдарбек Сапаров Түркияның Ауыл және орман шаруашылығы министрі Ибрахим Юмаклымен кездесті, деп хабарлайды kazlenta.kz тілшісі ҚР АШМ баспасөз қызметіне сілтеме жасап.
Кездесу барысында тараптар агроөнеркәсіп саласындағы ынтымақтастықтың қазіргі жағдайы мен даму перспективаларын талқылады. Екі ел арасындағы тауар айналымы шамамен 300 млн АҚШ долларын құрайды. Аталған көрсеткішті арттыруға елеулі әлеует бар. Негізгі экспорттық позициялар қатарында көкөністер мен бұршақ дақылдары — 163,2 мың тонна (106%-ға өсім), мақта талшығы — 29,5 мың тонна (39%-ға өсім) және басқа да өнімдер бар.
Айдарбек Сапаров өзара сауда номенклатурасы мен көлемін кеңейтуге, атап айтқанда түрік нарығын мал шаруашылығы өнімдеріне ашуға қызығушылық білдірді.
«Өткен жылы ет және сүт өнімдерін өзара экспорттау үшін нарықтарды ашуға бағытталған кешенді жұмыс жүргізілді. 2005 жылдан бері қолданыста болған аусыл, құс тұмауы және нодулярлы дерматитке байланысты шектеулер алынып тасталды. Бүгінде қазақстандық сиыр еті әлемнің 8 еліне экспортталады. Біз бұл өнімнің жыл сайын 10 мың тоннадан астамын түрік нарығына жеткізуге дайынбыз», — деді министр.
Санитарлық және фитосанитариялық бақылау мәселелеріне ерекше көңіл бөлінді. 2025 жылы Қазақстан Еуроодақ нарығына бал экспорттауға рұқсат алған елдер тізіміне енді. Қазіргі уақытта аквакультура және қымыз етін экспорттау бойынша валидация жұмыстары жүргізілуде. Болашақта — сүт өнімдері мен сиыр етін шығару жоспарда бар.
Сондай-ақ, Айдарбек Сапаров қатты бидай, оның ішінде дурум және hi-pro сорттарын жеткізу мәселесін көтерді. Логистикалық шешім ретінде Баку астық терминалы базасында бірлескен астық хабын құру ұсынылды. Бұл бастама жеткізу тізбегін оңтайландырып, оның тұрақтылығын қамтамасыз етуге мүмкіндік береді.
Өз кезегінде Ибрахим Юмаклы АӨК саласындағы ынтымақтастықты тереңдетуге дайын екенін білдірді.
«Қазақстан елеулі аграрлық әлеуетке ие және өңірлік азық-түлік қауіпсіздігін қамтамасыз етуде маңызды рөл атқарады. Түркия қазақстандық агроөндірушілермен байланыстарды нығайтуға, өзара тауар айналымын кеңейтуге және бірлескен инвестициялық жобаларды іске асыруға мүдделі. Біз агротехнологиялар, ирригация, органикалық егіншілік және тұрақты ауыл шаруашылығы салаларындағы тәжірибемізбен бөлісуге дайынбыз», — деп атап өтті ол.
Кездесу қорытындысы бойынша тараптар Қазақстан мен Түркия арасындағы аграрлық әріптестіктің тұрақты дамуы екі елдің экономикалық өсіміне және азық-түлік қауіпсіздігінің нығаюына септігін тигізетініне сенім білдірді.