Шымкент қаласы Жастар ресурстық орталығының ұйымдастыруымен Арбат демалыс аймағында мемлекеттік бағдарламаларды насихаттауға арналған ақпараттық-түсіндіру жұмыстары жүргізілді, деп хабарлайды kazlenta.kz тілшісі Шымкент қаласы әкімінің баспасөз қызметіне сілтеме жасап.
Аталған түсіндірме жұмыстарының мақсаты – жұмыссыз жастарды жұмыспен қамту, кәсіпкерлік бағдарламалары жөнінде ақпараттармен таныстыру. Түсіндірме жұмыстары барысында қаламыздың жастарына мемлекеттік жұмыспен қамту бағдарламалары - «Жастар практикасы», «Алғашқы бос жұмыс орны» және «Ұрпақтар келісім-шарты» жөнінде ақпараттар берілді.
Сонымен қатар, Қазақстан Республикасы Еңбек және халықты әлеуметтік қорғау министрлігінің Кәсіпкерлікті дамыту жөніндегі 2021-2025 жылдарға арналған ұлттық жоба шеңберінде іске асырылатын шағын несие 21 жастан 35 жасқа дейінгі жас кәсіпкерлерді қолдауға бағытталған 2,5% несие жөнінде де толыққанды мағлұматтар айтылып, жадынамалық парақшалар тарқатылды.
Шымкент қаласы Еңбек мобильділігі орталығының мәліметіне сәйкес 2025 жылдың бірінші жартыжылдығында субсидияланатын жұмыс орындары бойынша «Жастар практикасы» бағдарламасымен – 596 жас, «Алғашқы жұмыс орны» жобасы арқылы – 131 жас, «Күміс жас» жобасы бойынша – 352 адам, тұрақты жұмыс орындарына – 6016 азамат жолданды.
Сонымен бірге, жыл басынан бері мүгедектігі бар 67 азамат пен пробация есебінде тұрған 22 адам жұмысқа орналастырылған.Аталған бағыттағы жұмыстар алдағы уақытта да жалғасатын болады.
